Украинанинг ғалаба режаси беш банддан иборат. Шунингдек, у учта махфий қоидани ўз ичига олади.
Шарқий Европа ҳисобот бюросига кўра, бу ҳақда Олий Радада режани тақдим этган Украина президенти Владимир Зеленский айтиб ўтган.
Зеленскийнинг маълум қилишича, биринчи банд геосиёсий масалалар, иккинчи ва учинчиси ҳарбий масалалар билан боғлиқ. Тўртинчи банд иқтисодий соҳага, бешинчиси эса хавфсизликка тегишли.
Унинг сўзларига кўра, асосийси Украинанинг НАТОга интеграциялашув жараёнидир.
Режанинг мудофаа пункти махфий қўшимчага эга ва ёрдам кўрсатиш учун ҳарбий имкониятларга эга бўлган ҳамкорлар учун очиқдир. Учинчи банд ҳам АҚШ, Буюк Британия, Франция, Италия ва Германия раҳбарларига тақдим этиладиган махфий қисмга эга.
Зеленский тақдим қилган “ғалаба режаси” қуйидагилардан иборат:
1. Уруш тугагунга қадар Украинани НАТОга қабул қилиш.
2. Россия ҳудудида операцияларни давом эттириш ва унинг ҳудудида зарба бериш бўйича чекловларни бекор қилиш. Россия авиациясини шериклар билан биргаликда мағлуб этиш, Украина дронлари ва ракеталаридан фойдаланишни кенгайтириш; ҳамкорларнинг разведка маълумотлари билан танишиб бориш.
3. Украина ҳудудида “ядровий бўлмаган тийиб туриш пакет”ини жойлаштириш.
4. Украинанинг стратегик ва иқтисодий салоҳиятини ривожлантириш ҳамда Россияга қарши санкцияларни кучайтириш.
5. Уруш тугаганидан кейин Украина ҳарбийлари НАТО ва Европа мудофаасини кучайтириш учун ўз тажрибаси билан ўртоқлашиши мумкин. АҚШнинг Европадаги контингенти ўрнини Украина армияси эгаллаши мумкин.
Изоҳ (0)