Ўзбекистонда 18 октябрь куни олтин қуйма ва эсдалик тангалар нархи рекорд даражада ошди. Бу ҳақда Марказий банк маълум қилди.
Бир грамм олтин ҳозирда 1 миллион 148 минг 740 сўмга баҳоланмоқда. Беш граммлик олтин қуйманинг нархи 5 миллион 744 минг сўмни ташкил қилмоқда.
Олдинги нарх рекорди уч ҳафта олдин қайд этилганди. Олтин қуймалар нархи кетма-кет беш кун кўтарилганди. Сўнг қимматбаҳо металл нархи бир мунча пастлади. Йил бошидан бери олтин нархи 35,5 фоизга ошди.
Айни пайтда олтин нархи бир троя унцияси 2670 долларга яқинлашмоқда. Экспертларнинг фикрича, глобал ноаниқлик фонида ҳимоя активи сифатида олтинга қизиқиш ортиб бормоқда. UBS Group прогнозига кўра, бозордаги ўзгарувчанлик АҚШ сайловлари тугагунига қадар ва янги маъмурият тасдиқланмагунча давом этади.
Олтин қуймалар нима ва улардан қандай фойдаланиш мумкин?
Олтин қуймалар — оғирлиги 5, 10, 20 ва 50 грамм бўлган, 999,9 софликдаги олтиндан тайёрланган қуймалар. Махсус ҳимоя қадоқларида сотув учун тақдим этилади. Олтин қуймаларнинг қадоғи сертификат вазифасини бажаради ва ўз серия рақамига эга бўлади.
Олтин қуймалари ҳимояланган қадоқларда сотилади ва уларни бемалол уйда ёки банкда — индивидуал банк ячейкаларини ижарага олган ҳолда сақлаш мумкин. Уларнинг нархи бир ҳафта ичида бир неча марта ўзгариши мумкин. Олтин қуймаларини фақат банкларга сотиш мумкин.
Олтинга инвестиция киритиш ишончлими?
Олтин бошқа металлар сингари гиперинфляция ва молиявий бозорлардаги глобал тартибсизлик даврида ҳам нол даражада қадрсизланмайди. Шу маънода у ҳақиқатан ҳам қимматли қоғозлар ва валютага қараганда ишончлироқдир.
Бироқ, бошқа томондан, олтин нархи жуда ўзгарувчан. Қисқа муддатга сармоя киритишга қарор қилганлар учун бундай инвестиция фойдали бўлишига кафолат йўқ. Шунинг учун қимматбаҳо металларга сармоя киритиш одатда узоқ муддатли (10-20 йил) сармоя сифатида тавсия этилади. Узоқ муддатда уларнинг қийматининг ўсиши кўпинча инфляциядан ўзиб кетади.
Изоҳ (0)