Россия Эрон воситачилигида Яман шимолида ҳукмронлик қилувчи “Ансор Аллоҳ” ҳаракати (ҳусийлар) билан кемага қарши П-800 қанотли ракеталарини етказиб бериш бўйича яширин музокаралар олиб бормоқда. Бу ҳақда тегишли манбаларга таяниб Reuters хабар берди.
Нашр суҳбатдошларига кўра, музокаралар Эроннинг собиқ президенти Иброҳим Раисий даврида бошланган. Икки минтақавий расмийнинг айтишича, Россия ва ҳусий вакиллари Теҳронда бу йил камида икки марта учрашган, келгуси ҳафталарда яна учрашувлар бўлиши кутилмоқда. Бироқ Reuters манбаларига кўра, Россия ҳозирча ракеталарни ҳусийларга топшириш бўйича қарор қабул қилгани йўқ.
“Эронликлар бу музокараларда воситачилик қилмоқда, бироқ уларга қўшилишни истамаяпти”, деди Ғарб разведкасидаги манба.
Мутахассисларнинг таъкидлашича, 300 км гача учиш масофасига эга бўлган Россиянинг П-800 Оникс ракеталари ҳусийларга Қизил денгиздаги тижорат кемаларини аниқроқ уриш имконини беради ҳамда АҚШ ва Европа ҳарбий кемаларига таҳдидни оширади.
Манбаларга кўра, ҳусийларга ракета етказиб бериш қарори Украинага Россия ичидаги нишонларга узоқ масофали қуроллардан ўқ отиш имкониятини муҳокама қилаётган Ғарб давлатларининг позицияси билан боғлиқ бўлиши мумкин.
Америка расмийсига кўра, АҚШ делегацияси Саудия Арабистонидаги ҳамкасблари билан Россия ва ҳусийлар ўртасидаги таклиф қилинган музокараларни муҳокама қилган. Агентликнинг уч нафар суҳбатдоши саудияликлар Россия вакилларига ракета етказиб бериш бўйича АҚШ хавотирларини етказган.
Ҳусий вакили Муҳаммад Абдул-Салам журналистларнинг ракета музокаралари ҳақидаги саволига жавобан бу ҳақда ҳеч қандай тасаввурга эга эмаслигини айтган.
Аввалроқ Россия президенти Владимир Путин Ғарбнинг Украинага қурол етказиб беришига жавобан Москва бошқа давлатларни Ғарб нишонларига ҳужум қилиш учун қурол билан таъминлашга ҳақли эканини маълум қилган эди.
Изоҳ (0)