1994 йил 14 октябрда Френсис Дарабонт режиссёрлик қилган “Шоушенкдан қочиш” фильми жаҳон экранларига чиқди. Бу умидсизликда яшашни истамайдиган инсонлар ҳақидаги самимий бир ҳикоя. Ушбу севимли фильмнинг 30 йиллигига бағишлаб, унинг яратилиши жараёнига оид 10 та қизиқарли фактни эътиборингизга ҳавола қиламиз.
“Шоушенкдан қочиш”ни Роб Райнер суратга олиши мумкин эди
Фильм устида бевосита иш бошланмасидан олдин Френсис Дарабонт Роб Райнердан жуда яхши таклиф олади — “Шоушенкдан қочиш”ни экранлаштириш ҳуқуқи учун 2,5 миллион доллар. Ўша пайтда Дарабонт карьерасини эндигина бошлаётган эди, Райнер эса киносаноатда катта мавқега эга бўлган.
Райнер Энди ва Ред ролларига Том Круз ҳамда Гарисон Фордни олишни хоҳлаган. Бахтга қарши Дарабонт ушбу таклифни рад этади, бу қарорини “Шоушенкдан қочиш” — унинг буюк иш қилиши учун ноёб имконият” деб тушунтиради ва у ҳақ бўлиб чиқди.
Клинт Иствуд Ред ролига кастинг топширган
Стивен Кинг ҳикоясида Ред “ўрта ёшлардаги, сочлари оқарган, малласоч ирланд” сифатида тасвирланган. Дастлаб кино ижодкорлар кастинг жараёнида тасвирланган образни яратишни режалаштирган. Энди Дюфрейнга ўхшаш европача кўринишга эга юзлаб эркаклар, жумладан, машҳур актёрлар Пол Нюман, Роберт Редфорд, Гарисон Форд ва ҳатто Клинт Иствуд ҳам кўриб чиқилган.
Бироқ Френсис Дарабонт ҳар доим Ред образида фақат Морган Фриманни кўрган. Режиссёрга Фриманннинг табиийлиги ёққан: унинг юриш ва гапириш услубининг самимийлиги образига жуда мос келади.
Фильм жаҳон кинотеатрларида муваффақиятсизликка учраган
Ҳозирда “Шоушенкдан қочиш” ўлмас классика сифатида тан олинади. Бироқ 1994 йилда фильм жаҳон кинотеатрларида яхши натижа кўрсата олмайди ва муваффақиятсиз деб топилади. 25 миллион долларлик бюджетга эга бўлган ҳолда, у бор-йўғи 18 миллион доллар йиғолади: содда қилиб айтганда, фильм сарфланган маблағларни ҳам қоплаб бера олмайди. Бир қатор “Оскар” номинацияларидан сўнг, картина яна 10 миллион доллар даромад олади, аммо бу ҳам фильмни даромадли деб ҳисоблаш учун етарли бўлмайди.
Фильмнинг ҳақиқий муваффақияти телевидение, аниқроғи, Cаstle Rock студиясини сотиб олган ва “Шоушенкдан қочиш”ни трансляция қилиш ҳуқуқини лицензиялаган ТНТ канали туфайли келади. Warner Home Video бутун мамлакат бўйлаб “Шоушенкдан қочиш”нинг 320 минг нусхаси сотилади, бу ўша йил учун рекорд кўрсаткич эди.
Ҳайвонларни ҳимоя қилувчилар суратга олиш гуруҳига личинкаларни ўлдиришни тақиқлаган
Фильм сюжетига кўра, кутубхоначи қария Брукс (Жеймс Уитмор) қарға боқиб олади ва уни вақт-вақти билан личинкалар билан озиқлантиради. Қушни боқиш саҳнасини суратга олиш учун ижодий гуруҳ анча қийинчиликларга дуч келади. АҚШда барча тирик мавжудотлар иштирокидаги саҳналар ҳайвон ҳуқуқларини ҳимоя қилувчи ташкилотлар томонидан қатъий назорат қилинади.
“Шоушенкдан қочиш” суратга олиш майдончасида ҳозир бўлган фаоллар қарға ейдиган личинкаларни ўлдиришни тақиқлашади. Натижада Дарабонт ва ижодий жамоа қарғани боқиш учун табиий равишда ўлган личинкаларни топишга мажбур бўлади.
Морган Фриманнинг ўғли ёш Ред ролини ўйнаган
Реднинг шартли равишда озодликка чиқарилиши ҳақидаги ҳужжатларга ёпиштирилган суратлар Морган Фриманнинг ёшликдаги фотосуратлари эмас. Бу фотосуратлар унинг ўғли Алфонсо Фриманга тегишли. Маълум бўлишича, Девид Финчернинг “Етти” триллерида ҳам у дактилоскопия мутахассиси ролини ўйнаган.
Фильмнинг бир саҳнаси 9 соатдан кўпроқ суратга олинган
Ишониш қийин, лекин Энди ва Ред биринчи марта суҳбатлашадиган саҳна тўққиз соатдан ортиқ суратга олинган. Кўринишидан, кадрда ҳеч қандай фавқулодда нарса содир бўлмайди: бир эркак туриб гапиради, иккинчиси эса бейзбол тўпини улоқтиради. Бироқ Дарабонт олинган дубллардан ҳеч бирини ёқтирмайди ва Фриман тўққиз соат давомида деярли танаффуссиз тўп ўйнашга мажбур бўлади. Актёр шикоят қилмаган бўлса-да, бу жараён унга қийинчилик туғдиради — елкасидаги пайлар чўзилгани учун эртаси куни Фриман қўлини боғлаб келади.
“Шоушенкдан қочиш” фильмида Френсис Дарабонтнинг қўл ва оёқларини кўриш мумкин
Ҳамма Энди Дюфрейн ролини Тим Роббинс ижро этганини билади. Аммо персонаж иштирок этган барча саҳналар аслида уники эмас. Дюфрейннинг қўл ва оёқлари яқин планда кўрсатилган саҳналарда аслида режиссёр Френсис Дарабонтнинг қўл-оёқлари намойиш этилган. Масалан, Энди милтиқни ўқлаётган ёки қамоқхона деворида ўз исмини ўяётган саҳналарда ҳам. Ушбу саҳналар Дарабонт томонидан “Шоушенкдан қочиш”нинг суратга олиш ишларидан кейинги босқичида қўшилган.
Қочиш саҳнасида ҳақиқий гўнг ишлатилган
Кўпчилик Энди Дюфрейннинг канализация орқали эмаклаб, узоқ кутилган озодлик сари ҳаракат қилган саҳнасини яхши эслайди. Дюфрейн ролини ижро этган Тим Роббинснинг интервьюларидан бирида у айнан шу саҳнада қийналганини тан олган, чунки фильмда сохта эмас, балки ҳақиқий қорамол гўнги ишлатилган. Суратга олиш майдончасида жуда кучли ҳид тарқалган, актёр ҳатто заҳарланишдан жуда қўрққан.
Фильм АҚШ иқтисодиётини кўтарган
Гарчи фильм дунё бўйлаб муваффақият қозонмаган бўлса-да, “Шоушенкдан қочиш” АҚШ иқтисодиётига сезиларли ҳисса қўшади. Суратга олиш ишлари Огаё штатининг учта шаҳрида бўлиб ўтган: Менсфилд, Эшленд ва Аппер-Сандаски. Фильмда кўрсатилган 13 локация ушбу учта минтақага бўлинган. Кейинчалик, бу жойлар “Шоушенкдан қочиш”нинг миллионлаб мухлислари учун машҳур туристик йўналишларга айланди. Конгресс ва туризм ишлари бюроси маълумотларига кўра, фильм чиқиши билан Менсфилд, Эшленд ва Аппер-Сандаскига 20 мингдан ортиқ турист ташриф буюрган ва улар давлат бюджетига уч миллион доллардан кўпроқ даромад келтирган.
Изоҳ (0)