Европа иттифоқи Россия билан ҳамкорлик қилгани учун Эронга қарши янги санкцияларни маъқуллади ва бу рўйхатга еттита жисмоний ва етти нафар юридик шахсни киритди.
ЕИга кўра, уларнинг барчаси Россияга баллистик ракеталарни топшириш учун жавобгардир. Москва ва Теҳрон Украинада фойдаланиш учун Эрон қуролларини Россияга етказиб беришни рад этмоқда.
Қайд этилишича, ЕИ ТИВ раҳбарларининг Люксембургдаги йиғилишида шундай қарор қабул қилинган. Санкциялар Эроннинг учта авиакомпаниясига (Iran Air, Sahа Airlines, Mahan Air), шунингдек, тўртта саноат ва транспорт компаниясига, жумладан, энг йирик алюминий ишлаб чиқарувчилардан бири — Iran Alumina Company’га қаратилган.
Санкциялар, шунингдек, Ислом инқилоби қўриқчилари корпусининг “Қудс” кучларининг уч нафар аъзоси, Эроннинг Россиядаги элчихонаси ҳарбий атташеси Ризо Хосравий Моғаддам ва Эрон Мудофаа вазири ўринбосари Сейид Ҳамзеҳни ҳам ўз ичига олган.
Европа иттифоқининг Эронга нисбатан Россия билан ҳамкорлик қилиш, шунингдек, “Яқин Шарқ ва Қизил денгиз минтақасидаги қуролли гуруҳлар ҳамда ташкилотларни қўллаб-қувватлаганликлари учун” илгари тасдиқланган санкциялари 2025 йил 27 июлгача амал қилади. Бу режим, бошқа ЕИ чекловлари режимлари каби, мунтазам равишда кўриб чиқилади ва узайтирилади.
Изоҳ (0)