Европа комиссияси Россияга қарши санкцияларнинг ўнинчи пакетини эълон қилди. Еврокомиссия президенти Урсула фон дер Ляйен видеомурожаатида бу ҳақда маълумот берди.
Европа Иттифоқидан Россияга қиймати 11 миллиард евродан ортиқ бўлган муҳим технологиялар ва саноат маҳсулотларини экспорт қилиш тақиқланади. Россия иқтисодиётига максимал даражада таъсир ўтказиш учун Москвага зарур бўлган саноат товарларининг кўп турларига мақсадли равишда чекловлар жорий этилади.
“Муҳим маҳсулотлар қаторига электроника, транспорт воситалари, машина қисмлари, реактив двигателлар киради”, — деди Еврокомиссия раҳбари.
Бундан ташқари, Россия ҳарбийларига ўтказилиши мумкин бўлган қурилиш товарларига чекловлар жорий этиш таклиф қилинмоқда. Икки томонлама ва илғор технологияли маҳсулотлар экспорти чекланади.
“Биз Россия қурол тизимларида ишлатилиши мумкин бўлган 47 та электрон компонентлар учун экспорт назоратини таклиф қиламиз“, — дейди Урсуна фон дер Ляйен.
У мазкур чора ёрдамида Украинага қарши урушда жанг майдонида қўлланилган қуролларда топилган барча товарларни Россияга сотиш тақиқланишини айтди.
“Россия бу товарларни олишнинг бошқа йўлларини тополмаслигига ишонч ҳосил қиламиз”, — деди сиёсатчи.
Европа Иттифоқи тарихда биринчи марта санкцияга Россия томонидан четлаб ўтиш учун фойдаланиладиган учинчи давлат тузилмаларини қўшди. Жумладан, еттита Эрон ташкилоти санкциялар қаторидан жой олди. Еврокомиссия Россияга муҳим технологияларни етказиб берувчи давлатларга қарши санкцияларни давом эттиришга тайёр.
Россиянинг сиёсий ва ҳарбий раҳбарлари билан бир қаторда Путиннинг тарғиботчиларини ҳам санкциялар рўйхатига киритиш таклиф қилинмоқда. Гап 100 дан ортиқ жисмоний шахслар ҳақида кетмоқда. Санкцияларни четлаб ўтишнинг олдини олиш учун янги чоралар қўлланилади.
“Санкциялардан қочиш учун ўз активларини яшириш ёки сотишга уринаётган олигархларни кузатиб борамиз. Аъзо давлатлар билан биргаликда Россия Марказий банкининг Европа Иттифоқидаги музлатилган барча активлари ҳақида умумий маълумот яратамиз. Украинани қайта тиклашни молиялаштириш учун Россия давлат активларидан фойдаланиш мумкинлигини ҳисобга олсак, бу жуда муҳимдир”, — деди Урсула фон дер Ляйен.
Таъкидланишича, россияликларга стратегик аҳамиятга эга Европа компанияларида раҳбарлик лавозимини эгаллаш тақиқланиши мумкин, Россиянинг 4 та банкига нисбатан ҳам санкция қўлланилади ва улар SWIFT тизимидан узилади.
Изоҳ (0)