Европа Иттифоқи яқин орада Эроннинг баллистик ракеталарни Россияга топшириши билан боғлиқ шахслар ва ташкилотларга нисбатан санкциялар жорий қилади. Бу ҳақда европалик икки дипломат ва ЕИнинг юқори мартабали амалдори маълум қилди, деб ёзади Reuters.
Дипломатлардан бири Европа Иттифоқи ташқи ишлар вазирлари ракеталарни етказишда ёрдам берган 14 нафар шахс ва ташкилотга, жумладан, авиакомпаниялар ва бошқа компанияларга нисбатан санкциялар жорий этишини айтди.
Шу билан бирга, европалик расмийлар улар қандай компаниялар ёки шахслар эканлигини айтишмади. Аввалроқ Иран Аир миллий авиакомпаниясига нисбатан чекловлар қўлланилиши мумкинлиги ҳақида хабар берилган эди.
Ўз навбатида, ЕИ вакиллари Европа давлатлари ўртасида Эроннинг қудратли ҳарбий кучи – Ислом инқилоби қўриқчилари корпусига қарши санкциялар қўллаш ёки қўлламаслик борасида келишмовчиликлар давом этаётганини таъкидлади.
Изоҳ (0)