Қирғизистон давлат котиби Суйинбек Касмамбетов Марказий Осиё давлатларини тарихий бирликка қайтишга чақирди. У Қозоғистонда бўлиб ўтган медиа-форумда бу бўйича нутқ сўзлади.
Касмамбетовнинг сўзларига кўра, СССР парчаланганидан сўнг, Марказий Осиёнинг бешта давлати мустақилликка эришгач, стратегик мақсадларини белгилаб, ўзларининг ривожланиш модели билан фаол шуғулланди.
«Бу қийин йўл. Тўғрисини айтсам, ўшанда минтақавий ўзига хослик орқада қолган, ҳар ким ўзининг ички муаммоларига берилиб кетганди. Мустақилликнинг 30 йилида Марказий Осиёнинг барча давлатлари халқаро ҳамкорликни шакллантириб, узоқ ривожланиш йўлини босиб ўтди», — деди Қирғизистон давлат котиби.
Суйинбек Касмамбетов бугунги кунда Марказий Осиё мулоқот платформаларида ягона иштирокчи сифатида тақдим этилганини таъкидлади.
«Биз Марказий Осиёда манфаатдор барча ташқи ўйинчилар билан ўзаро алоқадамиз. Булар: Хитой, Туркия, Россия, Европа Иттифоқи, АҚШ, Ҳиндистон, Япония, Корея, Эрон. Аммо асосий муаммо шундаки, улар минтақага нисбатан ўз қарашларига эга. Бизда бундай умумий фикр йўқ. Ҳудуд сифатида биз бировнинг кун тартиби доирасида ҳаракат қилмоқдамиз», – деди спикер.
У интеграция жиҳатлари, Марказий Осиё давлатларининг минтақавий ўзига хослиги, умумий маданий меросига батафсил тўхталиб ўтди.
«Бизни география бирлаштирган, умумий тил илдизи, тарих, маданиятимиз мавжуд, мусулмон дунёсига мансублигимиз муштарак. Айни пайтда минтақавий ўзлигимиз шаклланиш босқичида. 30 йил давомида биз ҳали ҳам ягона геосиёсий объектга айланганимиз йўқ. Шу учун умумий маданий илдизлардан хабардор бўлиш зарур. Менимча, бу мавзу бўйича муҳокамани бошлашимиз керак. Тарихий бирликка қайтиш учун интеллектуал элитани мулоқотга жалб қилиш зарур», — дея қўшимча қилди у.
Мавзуга доир: Европа Иттифоқи Марказий Осиёга Россия ва Хитойдан кўра кўпроқ сармоя киритгани маълум қилинди
Изоҳ (0)