Москвага қарши санкциялар доирасида Европа Иттифоқида музлатилган Россия активларининг бир қисми Чехия ташаббуси билан Украина учун ўқ-дорилар сотиб олишга йўналтирилади. Бу ҳақда Чехия мудофаа вазири Яна Чернохова хабар берди.
Чернохованинг сўзларига кўра, блок раҳбарияти бир неча ҳафта олдин тегишли таклиф билан Прагага мурожаат қилган. Мамлакат Мудофаа вазирлиги пул ажратувчи ЕИ ва қурол етказиб берувчилар ўртасида воситачи ролини ўйнайди.
Вазир Киев “бир неча юз минг йирик калибрли ўқ-дорилар” олишини кутмоқда.
Ғарб мамлакатларида 2022 йилда Украинада уруш бошланганидан сўнг Россиянинг қарийб 280 миллиард долларлик активлари блокланган эди. 2023 йилда 4,4 миллиард евро соф фойда келтирган Бельгиянинг Euroclear депозитарийсининг учдан икки қисмидан кўпроғи, Financial Times'нинг ҳисоб-китобларига кўра, 2027 йилга келиб умумий фойда 20 миллиард еврога етиши мумкин.
Июль ойи охирида Еврокомиссия музлатилган активлардан фойдаланган ҳолда Киевга 1,5 миллиард евро миқдорида ёрдам ажратилишини эълон қилган эди. Маблағларнинг 90 фоизи “энг муҳим ҳарбий техника”, яъни ҳаво мудофааси тизимлари ва артиллерия ўқ-дориларини сотиб олишга, қолган қисми Украинани тиклашга йўналтирилади. Кремль Европа Иттифоқининг қарорини ноқонуний деб атаган. Россия томони Украина армиясига қурол етказиб берилишини қоралаган.
Чехия февраль ойида Украина учун 500 мингта 155 мм ва 300 мингта 122 мм снарядларни ЕИ ва НАТОга аъзо бўлмаган давлатлар арсеналидан топмоқчи эканини эълон қилган эди. Ташаббусга 20 та давлат қўшилган. Снарядларнинг биринчи партияси июнь охирида Киевга етказилган.
Изоҳ (0)