49 yoshli Gollivud yulduzi Anjelina Joli Deadline nashri jurnalistiga bergan intervyusida opera xonandasi Mariya Kallas obrazini yaratgan yangi film va uning hayotiga ta’siri haqida ma’lumot berdi.
“Mariya” nomli biografik film haqidagi suhbatda Joli bunday rollar hayotda bir marta berilishini alohida ta’kidlab o‘tdi. Shuningdek, aktrisa rejissyor Pablo Larrain bilan juda uzoq vaqtdan beri ishlashni istagani va bu maqsadi amalga oshganidan mamnun ekanini bildirdi.
“Filmdagi Mariya obrazi meni shaxs sifatida o‘zgartirib yubordi. Film mening ichki muammolarimni davolashga yordam berdi”, dedi “Oskar” mukofoti sovrindori.
Suratga tushishga tayyorgarlik ko‘rish uchun Joli musiqa ilmini hamda Kallasning mahorat darslari bitilgan kitoblarni o‘rganib chiqdi.
“Bor ovoz va barcha ichki his-tuyg‘ularingiz bilan qo‘shiq kuylash uchun nafasni ushlab qolmaslik kerak. Bunday vaqtda siz asablaringizni jilovlashingiz shart emas, balki bor ovozingiz bilan emotsiyalarni, dildagi og‘riqlarni tashqariga chiqarib yuborishingiz kerak”, dedi Joli.
To‘g‘ri vokal texnikasi, italyan tili, opera aytish san’ati, suratga olishda qadni qanday tutish va nafas olish qoidalarini o‘rganish, bir so‘z bilan aytganda, turli murabbiylardan tinimsiz dars olish Anjelina uchun oson kechmadi.
“Mariya” filmi Chili davlatidan bo‘lgan rejissyor Pablo Larrainning biografik dramasi bo‘lib, unda 20-asrning eng buyuk opera xonandalaridan biri Mariya Kallasning hayoti haqida hikoya qilinadi. Filmdagi voqealar 1970-yillarda Parijda, Kallas karyerasining so‘nggi yillarida bo‘lib o‘tadi. Uning premyerasi 2024-yil avgust oyida Venetsiya kinofestivalida bo‘lib o‘tdi.
Izoh (0)