Бутун дунёга шарманда қилган: Голливуд юлдузларининг “қулоқсиз” фарзандлари

Машҳур инсонлар халқ эътиборида экан, улар доимо ўз обрўси ва шаъни ҳақида қайғуриб келади. Бироқ уларнинг саъй-ҳаракатларига қарамай, баъзан юлдузларнинг ҳурмат-эътиборига уларнинг фарзандлари путур етказади. “РБК-Украина” нашри фарзандлари туфайли Голливуд ва бутун дунё олдида қизаришга мажбур қилган юлдузларни санаб ўтди.

Майкл Дуглас ва унинг ўғли Кемерон

2009 йилда Майкл Дугласнинг ўғли Кемерон Дуглас гиёҳванд моддалар савдоси билан шуғуллангани учун 7 йилга қамалди. Унинг тиббий маълумотномасида қайд этилган манбаларга кўра, Кемерон 13 ёшидан бошлаб гиёҳванд моддаларни истеъмол қилган, 20 ёшида героин истеъмолига ўтган ва 25 ёшида ҳибсга олинган пайтда кунига 5-6 марта укол олмасдан туролмайдиган гиёҳвандга айланган.

“Ўғлим мени халқ олдида уялтирди. Фикримча, қамоқхона унинг учун энг яхши жой. Кемерон ҳаётини қайта мулоҳаза қилиб, барчасини бошидан бошлашига ишонаман”, — дейди актёр. 2016 йилда Кемерон озодликка чиқди.

Жеки Чан ва унинг ўғли Жейси

Юқоридаги воқеаларга ўхшаш ҳолат тирик афсона — машҳур Жеки Чан оиласида содир бўлди. 2014 йилда Хитой ҳуқуқ-тартибот идоралари гиёҳвандликка қарши рейд ўтказганда Жеки Чаннинг ўғли гиёҳванд моддалар истеъмолида айбланиб, ҳибсга олинди.

Унинг квартирасида тақиқланган моддалар савдоси ва истеъмоли билан шуғулланган бошқа шахслар ҳам бор эди. Суд уни олти ойга озодликдан маҳрум қилди.

Кичик Роберт Дауни ва унинг ўғли Индио

Маълумки, актёр Кичик Роберт Даунининг ўтмиши анча оғир кечган. Унинг отаси ҳам актёр бўлган, Роберт эса болалигидан гиёҳванд моддаларга қарамликка дучор бўлган.

У илк марта 8 ёшида тақиқланган моддаларни татиб кўрган ва йиллар давомида гиёҳванд моддаларга қарамликдан азият чеккан. Бундай моддаларни уйда сақлаш ва реабилитация марказларида даволаниш каби воқеалардан сўнг Роберт ҳибсга олинган. Аммо актёр касаллик устидан ғалаба қозониб, кино саноатида иш бошлаган.

Афсуски, унинг ўғли ҳам ҳудди шундай тақдирни бошидан кечирди. Индио ҳам гиёҳванд моддалар сақлагани учун ҳибсга олинди.

Том Ҳенкс ва унинг ўғли Честер

2015 йилнинг баҳорида актёр Том Ҳенкснинг ўғли меҳмонхонада жанжал кўтариб, атрофидаги барча предметларни улоқтирган ва хоналарни вайрон қилган. Унинг қилмиши меҳмонхонага 1800 доллар зарар етказган. Орадан бир неча ой ўтиб, 25 ёшли Честер бирдан ғойиб бўлди ва бир ой давомида уйга қайтмади.

Том Ҳенкс ўғлини топиш учун хусусий детективларни ёллади. Аммо Честернинг ўзи уйга қайтиб келди. Маълум бўлишича, Том Ҳенкснинг ўғли реабилитация клиникасида гиёҳвандликка қарамликдан даволанган ва буни ота-онасидан яширган.

Николас Кейж ва унинг ўғли Вестон

2011 йилда машҳур актёр Николас Кейжнинг ўғли Лос-Анжелесдаги ресторанлардан бирида тренери билан жанжаллашиб қолган, чунки у Вестоннинг қоматига зарар етказадиган таомларни буюртма қилишни тақиқлаган.

Вестон жаҳлини тиёлмай, ўз тренерига қўл кўтарган ва муштлашув бошланиб кетган. Атрофдагилар уларни тинчлантира олмагач, руҳий саломатлик хизматларини чақиришга тўғри келган. Воқеа жойига етиб келган шифокорлар Николас Кейжнинг тажовузкор ўғлини ўзлари билан олиб кетишган.