Ҳар ишни мукаммал бажаришга уриниш ва доимий ўзини танқид қилиш ҳолати кўплаб машҳур инсонларга хосдир. Қуйидаги юлдузлар ҳам “идеал мен”га эришишга жон-жаҳди билан интилади ва ҳатто оддий юмушни ҳеч кимга ишонмайди.
Остин Батлер
Остин Батлер ҳар бир образи учун пухта тайёргарлик кўришга одатланган. Масалан, Элвис Пресли ролини ишонарли тарзда гавдалантириш учун актёр бир неча ой давомида қўшиқчининг архив видеоларини ўрганиб чиқди:
“Мен Элвис Преслининг барча чиқишлари, концертларини иложи борича қайта-қайта томоша қилдим, чунки Приссилла (собиқ рафиқаси) ва Лиза Мари (қизи) қўшиқчини жуда яхши кўради. Мен уларнинг ишончини оқлашни истадим”, деди актёр.
Бундан ташқари, Батлер фильмдаги овози хонанданинг овозига иложи борича ўхшаш бўлиши учун бир йил давомида профессионал вокалдан дарс олди.
Ким Кардашян
Кардашян доимий иш билан банд бўлгани учун уйга кам келади, аммо шунга қарамай уй ишларини ўзи бажаради. Чунки юлдуз бегона инсонларнинг унинг шахсий ҳудудига киришини истамайди:
“Уйимда хизматкорлар йўқ, чунки бегоналар менинг шахсий уйимга киришини ёқтирмайман. Эҳтимол, аввалги ҳаётимда уй бекаси бўлгандирман. Уйда қолиб, гардеробимни тартибга солиш менга ҳеч қандай қийинчилик туғдирмайди”, дейди Ким.
Зендея
Одатда суратга олиш майдонида мураккаб трюкларни бажариш учун дублёрлардан фойдаланилади. Бироқ Зендея барча кадрларда шахсан ўзи иштирок этишга ҳаракат қилади. Масалан, “Буюк шоумен” лойиҳасида Зендея барча акробатик трюкларни ўзи ижро этган. Бунинг учун актриса беш ой давомида машқ қилган.
Девид Бекҳэм
Девид Бекҳэм ҳам хизматкорларга ишонмайди, шунинг учун у кўпинча уй ва ҳовлидаги юмушларни ўзи бажаради. Футболчи ҳатто меҳмонхоналарга ташриф буюрганда ҳам йиғиштиришни канда қилмайди:
“Меҳмонхонага кирганимда, аввало барча нарсани тартибга соламан. Стол устидаги салфеткалар бир текис турмагунча мен ўзимни енгил ҳис қила олмайман”, дейди перфекционист футболчи.
Юлдузнинг севимли машғулоти — бу музлатгичдаги озиқ-овқат маҳсулотларини саралаб, тартиб билан жойлаштиришдир. Ичимликлар эса доимо жуфт-жуфт туриши керак.
Марго Робби
“Бобил” фильмида Марго Робби турли зиёфат ва тадбирларни севувчи Нелли образини ижро этган. Қаҳрамоннинг ғайратли энергиясини томошабинларга етказиб бериш учун Робби икки ҳафта давомида турли зиёфатларга ташриф буюрди. Кейинчалик актриса бундай турмуш тарзи жуда чарчатиши ва Маргога тўғри келмаслигини тан олди.
Эмма Уоцон
Эмма Уоцонга нисбатан салбий изоҳлар камдан-кам учрайди, шунга қарамай, актриса ҳали ҳам танқидларга дуч келади, чунки у ўзига нисбатан жуда талабчан ва ҳаддан ташқари қаттиққўлдир. Уоцон ўзининг ишидан доим камчилик излашга ва ўзини танқид қилишга одатланиб қолган:
“Болалигимдан ота-онам менга бажараётган ишимни ҳурмат қилишни ва сидқидилдан меҳнат қилишни уқтириб келган. Балки шу сабабли ўзимга нисбатан энг ашаддий танқидчига айлангандирман. Мен камдан-кам ҳолатларда кинодаги ишим натижаларидан ёки университетдаги баҳоларимдан қониқаман. Тан оламан, баъзида ўзимдан ҳам чарчаб қоламан”, дейди актриса.
Бенедикт Камбербетч
Бенедикт Камбербетч ҳам ҳар бир деталга алоҳида эътибор қаратадиган инжиқ актёр. 2021 йилда у “Ит қудрати” фильмида суратга тушди. Ушбу лойиҳа учун актёр вақтинча Монтанадаги ранчога оиласи билан кўчиб ўтди. У ерда Бенедикт катта фермер хўжалигига эга бўлган оила билан яшади. Ҳар куни улар актёр билан отда сайр қилар, отга тўғри миниш ва ковбойлик маҳоратидан дарс берар эди.
Бредли Купер
Ҳар ишни мукаммал бажаришга одатланган яна бир инсон бу Бредли Купердир. Режиссёр нафақат ўзига, балки ходимларига нисбатан ҳам қаттиққўлдир. Масалан, “Maestro” фильмини суратга олишда у сёмка жамоасини бегоналардан алоҳида қилган. Шунингдек, Купер иш вақтида ҳеч кимга ўтиришга рухсат бермайди:
“Мен стулда ўтириб ишлашни ёқтирмайман. Иш вақтида ўтириб олиш унумдорликни пасайтиради”, дейди режиссёр.
Изоҳ (0)