AQSH prezidenti Donald Tramp Amerika rasmiylari Rossiya rasmiylari bilan Ukrainada o‘t ochishni to‘xtatishni muhokama qilish uchun Moskvaga yo‘l olganini ma’lum qildi. Bu haqda BBC xabar bermoqda.
11-mart kuni Ukraina tomoni Saudiya Arabistonidagi muzokaralar natijasida 30 kunlik o‘t ochishni to‘xtatishga rozi bo‘lgan edi. Uchrashuvdan so‘ng Ukraina prezidenti Vladimir Zelenskiy endi AQSH Rossiyani sulh taklifiga rozi bo‘lishga ko‘ndirishi kerakligini aytdi. Rossiya tomoni esa masalani o‘rganayotganini ma’lum qilgan. Yaqin orada Tramp va Putin o‘rtasida telefon orqali muloqot bo‘lishi mumkin.
Donald Tramp oval kabinetda jurnalistlar bilan suhbatlashayotib, o‘t ochishni to‘xtatish imkoniyati haqida “ijobiy signallar” olganini ma’lum qildi. “Biroq ijobiy signallar hech narsani anglatmaydi. Bu juda jiddiy vaziyat” , dedi u.
Trampning so‘zlariga ko‘ra, agar Rossiya urushni davom ettirishga qaror qilsa, unga qarshi “halokatli” sanksiyalar kiritilishi mumkin.
Moliyaviy jihatdan unchalik yoqimli bo‘lmagan, ammo mening qo‘limdan keladigan ishlar bor. Bu Rossiya uchun juda yomon oqibatlarga olib keladi. Men bunday qilishni xohlamayman, chunki men tinchlikka erishishni istayman, dedi Tramp.
Shuningdek, u Ukraina tomonining o‘z pozitsiyasini o‘zgartirgani haqida gapirdi.
Zelenskiy tinchlikni xohlamaydigan odam edi. Endi u ham tinchlikka rozi bo‘ldi. Shunday ekan, buyog‘ini ko‘ramiz, deya qo‘shimcha qildi AQSH prezidenti.
Tramp Moskvaga aynan qaysi rasmiylar borayotganiga aniqlik kiritmagan.
Shu hafta boshida BBC manbasi Trampning Yaqin Sharq bo‘yicha maxsus vakili Stiv Uitkoff Jiddadagi uchrashuvdan keyin Rossiya poytaxtiga borishi haqida xabar bergandi. Oq uy 12-mart kuni bu xabarni tasdiqladi.
Oq uy matbuot kotibi Kerolayn Livittning ma’lum qilishicha, milliy xavfsizlik bo‘yicha maslahatchi Mayk Uolts “rossiyalik hamkasbi” bilan telefon orqali muloqot qilgan. Uolts ham aynan kim bilan gaplashganiga aniqlik kiritmagan.
Nima uchun Kiyev AQSH taklifiga tezda rozi bo‘ldi?
BBC’ning xavfsizlik masalalari bo‘yicha muxbiri Frenk Gardnerga ko‘ra,“Ukrainada o‘t ochishni to‘xtatish estafetasi Jiddadan Vashington va Moskvaga o‘tar ekan, gap ham “optika” haqida, ya’ni vaziyat qanday ko‘rinishi va odamlar uni qanday ko‘rishni xohlashi to‘g‘risida, ham frontdagi haqiqiy ahvol haqida ketmoqda.
“Ukraina rahbariyati do‘stlaridan maslahatlar olmoqda. Ular orasida Buyuk Britaniya bosh vazirining milliy xavfsizlik bo‘yicha maslahatchisi Jonatan Pauell ham bor, degan ma’lumotlar mavjud. Ularning Kiyevga yetkazayotgan xabari aniq: “Bu sizga yoqadimi yo‘qmi, lekin Oq uy bilan munosabatlarni yaxshilashingiz shart. Shu bois prezident Zelenskiy urushning tugashiga hali uzoq vaqt borligini aytmay qo‘ydi. Bu esa urushning darhol tugashini istayotgan prezident Trampni g‘azablantirmasligi kerak.
Shuning uchun Ukraina Amerika muzokaralar guruhining 30 kunlik to‘liq o‘t ochishni to‘xtatish taklifiga tezda rozi bo‘ldi. Bu Ukrainaga o‘zini xalqaro maydonda xuddi amerikaliklar singari tinchlikka intiluvchi tomon sifatida ko‘rsatish imkonini beradi”, dedi Gardner.
AQSH senatori Lindsi Grem Rossiya 30 kunlik o‘t ochishni to‘xtatishga rozi bo‘lishi kerakligini, aks holda unga qo‘shimcha sanksiyalar qo‘llash mumkinligini aytgandi. U “nafaqat Rossiyaga ta’sir ko‘rsatadigan, balki Rossiya tovarlarini, xususan, neft, gaz va uranni sotib oluvchi mamlakatlarga nisbatan sanksiyalar va bojlar joriy etadigan” Kongress tomonidan ko‘zda tutilgan sanksiyalarni joriy etishiga ishonch bildirgan.
“Rossiya Ukrainaga qo‘pol bostirib kirishi natijasida allaqachon yengib bo‘lmas iqtisodiy og‘riqni his qilishi kerak edi”, deya qo‘shimcha qildi u.
Ma’lumot uchun, Saudiyada AQSH—Ukraina delegatsiyalari o‘rtasidagi uchrashuv 9 soat davom etdi. Yakunda Ukraina 30 kunlik o‘t ochishni to‘xtatish taklifini qabul qilgan, lekin avval Rossiya rozi bo‘lishi kerakligi aytilgandi.
Kreml Jiddada AQSH va Ukraina o‘rtasidagi muzokaralarda ilgari surilgan takliflarni o‘rganayotganligini va Vashington Moskvaga uchrashuv tafsilotlari haqida axborot berishiga umid qilinayotganligi ma’lum qilingandi.
Izoh (0)