AQSH sudi Kolumbiya universiteti talabasi, falastinlik Mahmud Xalilni deportatsiya qilish bo‘yicha qarorni vaqtincha blokladi. U Isroilning G‘azodagi harakatlarini qoralab namoyishda qatnashgani uchun Qo‘shma Shtatlardan chiqarib yuborilish xavfi bilan yuzlashyapti.
Uning hibsga olinishi Falastin tarafdori bo‘lgan faollar Tramp ma’muriyati tomonidan jiddiy bosimga uchrayotgan bir vaqtda yuz bermoqda.
AQSH prezidenti Donald Tramp talabani “HAMASning xorijlik radikal tarafdori” deb atab, o‘zining ijtimoiy tarmoq sahifasida qoraladi. Shuningdek, hibsga olishlar davom etishini aytdi.
Mahmud Xalilning advokatlariga ko‘ra, u deportatsiya jarayoni yakunlangunga qadar Luizianadagi muhojirlar federal qamoqxonasiga jo‘natilgan.
Namoyishlar va noroziliklar
Nyu Yorkda yuzlab namoyishchilar ko‘chaga chiqib, Mahmudning qo‘lga olinishi so‘z erkinligiga hujum ekanini ta’kidladi. Manxettenda politsiya va namoyishchilar o‘rtasida kichik to‘qnashuv bo‘lib o‘tdi, kamida bir kishi hibsga olindi. Biroq shtat bosh prokurori va Amerika Fuqarolik Erkinliklari Ittifoqi (ACLU) falastinlik talabani qo‘llab-quvvatladi.
AQSHda doimiy yashash huquqiga ega bo‘lgan falastinlik talaba o‘tgan hafta oxirida qo‘lga olindi. U 2024-yil Kolumbiya universitetida boshlanib, butun dunyoga yoyilgan Isroilga qarshi ommaviy aksiya yetakchilaridan edi.
Mahmudning baxtiga, AQSH okrug sudi sudyasi Jessi Ferman uning deportatsiyasini keyingi farmoyishga qadar to‘xtatib qo‘ydi. Talabaning advokatlari sudyadan, shuningdek, uni Nyu Yorkka qaytarishni ham so‘radi. Huquqshunoslarning fikricha, rasmiylar Mahmudni himoyachilaridan uzoqlashtirish uchun atayin boshqa shtatga jo‘natgan.
Oq uy Mahmud Xalilga nisbatan biror rasmiy ayblov qo‘yilgani haqida ma’lumot bermadi. Ammo Donald Tramp uning Qo‘shma Shtatlarda bo‘lishi “milliy va xalqaro manfaatlarga zid” ekanligini yozgan.
Tramp universitetlarga bosim qilmoqda
7-mart kuni Donald Tramp Kolumbiya universiteti uchun 400 million dollar federal grant bekor qilishini e’lon qildi. Bunga sabab qilib kampusdagi “antisemitizm holatlari” ko‘rsatildi.
Shundan so‘ng AQSH Ta’lim vazirligi Garvard, Yel kabi jami 60 ta oliygohga xat yuborib, kampuslarda antisemitizmga qarshi choralar ko‘rishni so‘radi. Vazirlik bunday qilmagan muassasalar uchun federal moliyalashtirish qisqarishidan ogohlantirgan.
AQSH Ichki xavfsizlik vazirligi agentlari Mahmudni Qo‘shma Shtatlar fuqaroligiga ega homilador rafiqasi ko‘z o‘ngida qo‘lga olgan. Advokat Emi Grirning so‘zlariga ko‘ra, agentlar avvaliga uning talaba vizasi bekor qilinganini aytishgan. Rafiqasi ularga Mahmudning “yashil karta”si (Green card) borligini ko‘rsatgach, agentlar ushbu hujjatni ham bekor qilingan deb aytishgan.
Dushanba kuni Kolumbiya universiteti yahudiy professorlari falastinlik talabaning himoyasi uchun miting va matbuot anjumani o‘tkazdi. Ular “Yahudiylar deportatsiyalarga qarshi” yozuvi tushirilgan plakatlar ko‘tarib chiqishdi.
Izoh (0)