Shavkat Mirziyoyev 4-aprel kuni “Markaziy Osiyo—Yevropa Ittifoqi” birinchi sammitida so‘zlagan nutqida Ukraina bo‘yicha muzokaralarni qo‘llab-quvvatlashini aytib o‘tdi.
“Ukraina atrofidagi vaziyatni tinch yo‘l bilan hal etish bo‘yicha muzokaralar jarayonlari boshlanganini olqishlaymiz va to‘liq qo‘llab-quvvatlaymiz”, dedi prezident.
Davlat rahbari oldinda juda murakkab va yechimi oson bo‘lmagan masalalar turganini, biroq diplomatik sa’y-harakatlar va siyosiy qarorlar qabul qilishdan boshqa muqobil yo‘lni ko‘rmayotganini aytdi.
Shavkat Mirziyoyev “Markaziy Osiyo—Yevropa Ittifoqi” birinchi sammiti jadal va oldindan bashorat qilib bo‘lmaydigan global jarayonlar sharoitida o‘tayotganini ham qayd etib o‘tdi.
“Biz geosiyosiy ziddiyatlar, xavfsizlik muammolari, yirik mintaqaviy mojarolarning hamda barqaror taraqqiyotga nisbatan ijtimoiy va iqtisodiy tahdidlarning kuchayishiga guvoh bo‘lmoqdamiz. Ayonki, hech bir mintaqa keng xalqaro hamkorliksiz bu qadar murakkab masalalarni mustaqil holda hal etishga qodir emas”, dedi prezident.
Shu munosabat bilan Markaziy Osiyo va Yevropa Ittifoqi an’anaviy sheriklar ekanini, o‘zaro yaqin hamkorlik uchun talab faqat o‘sib borayotganini qayd etdi. O‘zbekiston ham Yevropa tomoni kabi xalqaro huquqning tamoyil va me’yorlariga sodiqligini bildirdi.
O‘zbekiston prezidenti sammitda Afg‘oniston masalasiga ham to‘xtaldi. Jahon hamjamiyati ushbu mamlakat hududidan kelib chiqadigan barcha tahdidlarni yetarlicha baholay olmayotganini qayd etib o‘tdi. Davlat rahbari o‘z nutqida Markaziy Osiyo va Yevropa Ittifoqi hamkorligini mustahkamlash bo‘yicha qator yangi tashabbuslarni ilgari surdi.
Izoh (0)