Rossiyada harbiy ro‘yxatga turishdan bo‘yin tovlagan shaxslar oldin olgan fuqaroligidan mahrum etilishi mumkin. Davlat Dumasiga tegishli qonun loyihasi kiritildi.
Loyiha Duma Mudofaa qo‘mitasi raisi Andrey Kartapolov boshchiligidagi deputatlar guruhi tomonidan ishlab chiqilgan. U bir vaqtning o‘zida ikkita amaldagi federal qonunga — “Harbiy majburiyat va harbiy xizmat to‘g‘risida” hamda “Rossiya fuqaroligi to‘g‘risida”gi qonunlarga o‘zgartishlar kiritishni nazarda tutadi.
Xususan, “asosli sababsiz” harbiy hisobga turishdan bo‘yin tovlagan shaxslarga berilgan pasportni qaytarib olish taklif etilmoqda. Harbiy komissariat (voyenkomat) bunday holatlar haqida Ichki ishlar vazirligiga 5 kun ichida xabar berishi kerak bo‘ladi. So‘ngra vazirlik fuqarolikni bekor qilish masalasida qaror qabul qiladi.
Agar fuqaro Ichki ishlar vazirligiga xabarnoma yuborilganidan so‘ng 30 kun ichida o‘z ixtiyori bilan harbiy komissariatga murojaat qilsa, u fuqarolikdan mahrum etilmaydi.
Tashabbuskorlarga ko‘ra, qonun loyihasi 2024-yil avgustida qabul qilingan boshqa qonunni amalda tatbiq etish zaruratidan kelib chiqqan. O‘sha qonunga ko‘ra, harbiy hisobga ilk bor turish majburiyatini bajarmaslik fuqarolikdan mahrum qilish uchun asos bo‘lishi mumkin. Biroq o‘sha qonunda bu mexanizm qanday amalga oshirilishi ko‘rsatilmagan edi.
O‘zgartirishlar ichki ishlar organlari va harbiy hisob bilan shug‘ullanuvchi organlarning birgalikdagi faoliyati samaradorligini oshirish imkonini beradi, deyiladi tushuntirish xatida.
Izoh (0)