Rossiyaning ikki viloyatidan 99 nafar bola dam olish uchun O‘zbekistondagi oromgohga keldi. Bu haqda 18-iyul kuni Rossiyaning O‘zbekistondagi elchixonasi xabar berdi.
Bolalar Rossiyaning Belgorod va Bryansk viloyatlaridan tashrif buyurgan. Aeroportda ularni O‘zbekistondagi Rossiya ishlari bo‘yicha vaqtinchalik ishonchli vakili Andrey Lanchikov, Kasaba uyushmalari federatsiyasi rahbariyati va Tashqi ishlar vazirligi vakillari kutib olgan.
Rossiyalik bolalarni Kasaba uyushmalari federatsiyasi mehmonga taklif qilgan. Ular Toshkent viloyatidagi “Anor” bolalar sog‘lomlashtirish oromgohida ikki hafta dam oladi.
“O‘zbekistonga yetib kelgan bolalarni mazali va to‘yimli nonushta bilan siyladilar hamda sovg‘alar topshirildi. Ertaga esa ular uchun lagerda tantanali ochilish marosimi bo‘lib o‘tadi”, deyiladi manba xabarida.
Elchixona tashkil etilgan tadbir uchun O‘zbekiston hukumatiga minnatdorlik bildirgan.
Ma’lumot uchun, o‘tgan oyda 100 nafarga yaqin ukrainalik bola “Anor” oromgohida dam olgandi. Madaniy dastur mahorat darslari, ekskursiyalar, intellektual o‘yinlar va sport musobaqalarini o‘z ichiga olgan.
Izoh (0)