AQSH prezidenti Donald Tramp Ukrainadagi urushni tugatish uchun Rossiyaga 50 kun muhlat bergandi. Rossiya Xavfsizlik kengashi rais o‘rinbosari Dmitriy Medvedev mazkur talabga javob qaytardi.
Tramp Kremlga dekorativ ultimatum qo‘ydi. Oqibatini kutib, dunyo larzaga keldi. Harbiy kayfiyatdagi Yevropaning hafsalasi pir bo‘ldi. Rossiyaga esa baribir, dedi Medvedev.
Bundan bir hafta avval Tramp Rossiyaga qarshi “kichik syurpriz” tayyorlayotganini aytgandi. O‘shanda u Ukrainadagi mojaroni hal qilish borasida Rossiya rahbariyatidan noroziligini bildirgan. Yaqinda Tramp NATO bosh kotibi Mark Ryutte bilan uchrashuvda Moskvaga qarshi yangi choralarni e’lon qildi.
Unga ko‘ra, agar Ukraina masalasida ijobiy natija bo‘lmasa, AQSH 50 kundan keyin Rossiyaning savdo hamkorlariga 100 foizlik boj joriy etadi. AQSH prezidenti Ukraina uchun 17 ta Patriot zenit-raketa tizimi yetkazilishi mumkinligini ham aytgan.
Men u bilan urushni to‘xtatish kerakligi haqida ko‘p gaplashaman. Go‘shakni qo‘yib, ajoyib suhbat bo‘ldi deyman. Keyin yana raketalar ucha boshlaydi. Bu g‘alati, deb o‘ylayman. Bunday holat 3-4 marta takrorlangach, bu suhbatlarning hech qanday ma’nosi yo‘qligini tushunib yetdim, degan Tramp.
Aslida, Trampning qo‘lida Rossiyaga “kuchli zarba berish” uchun huquqiy “bolg‘a” ham mavjud edi. Bu respublikachi senator Lindsi Grem va Konnektikut shtatidan demokrat Richard Blyumental tayyorlagan qonun loyihasi hisoblanadi. Unda Rossiyaga qarshi sanksiyalardan tashqari, Rossiya nefti, neft mahsulotlari, tabiiy gaz, uran va boshqa tovarlarni xarid qiluvchi mamlakatlardan import qilinadigan mahsulotlarga 500 foizlik bojlar belgilash ko‘zda tutilgan.
AQSH Yevropaga katta hajmda qurol sotmoqchi, bu esa oxir-oqibat Ukrainaga yordam beradi, degan Tramp bayonotidan oldin senator Grem.
U, shuningdek, Kongress yaqin orada AQSH tarixidagi eng katta sanksiyalar paketini qabul qilishini bildirgan. Bu sanksiyalar asosan Xitoy, Hindiston va Braziliyaga qaratilgan bo‘ladi.
Izoh (0)