Afg‘oniston shimolida, Markaziy Osiyo mamlakatlari bilan chegaradosh hududlarda keskin vaziyat saqlanib qolmoqda. “Tolibon”ning o‘z chegaralari yaqinidagi jangovar harakatlari tufayli, Turkmaniston ular tomonga o‘z qo‘shinlarini tortib bormoqda.
“Xronika Turkmenistana” nashrining muxbirlari ma’lum qilishicha, hozir “voyenkomat” (harbiy komissariat)larga harbiy xizmat o‘tashdan vaqtinchalik yoki doimiy asosda ozod qilingan shaxslar uchun navbatdan tashqari tibbiy komissiya o‘tkazish topshirilgan. Komissiyalar asossiz ravishda muhlat berilgan yoki armiyadan ozod etilgan odamlarni topishi kerak.
So‘nggi bir necha kundan buyon qishloq xo‘jalik birlashmalarining qishloq kengashlari tungi birgacha ishlamoqda, deyiladi xabarda. Ularga eng qisqa vaqtlar ichida o‘zlariga qarashli qishloqlarda yashaydigan harbiy xizmat yoshidagi kishilar ro‘yxatini taqdim etish topshirilgan. Shunday ish bilan shaharlarda politsiyaning fuqarolarni hisobga qo‘yish va ro‘yxatdan o‘tkazish bo‘limlari ham band.
Oxirgi yillarda ko‘p sonli erkaklar mamlakatni tark etgan, ba’zilari buni noqonuniy tarzda ham amalga oshirgan, ammo hujjatlar bo‘yicha ular hamon Turkmaniston hududida ro‘yxatga olingan.
Ushbu ma’lumotlar Mudofaa vazirligiga taqdim etiladi, muassasa ayni paytda armiyaning real zaxiralarini aniqlashtirmoqda.
“Azatlik” radiosi ham Ashxobodda 40 yoshgacha bo‘lgan zaxiradagi harbiy xizmatchilar “voyenkomat”larga chaqirilayotganini xabar qildi. Ular hozircha harbiy xizmatga chaqirilmasligi haqida ogohlantirilgan, ammo yuqori tayyorgarlik darajasi haqida gapirilmoqda. Lebap viloyatida ham zaxiradagilar ro‘yxati tayyorlanmoqda, u yerda “voyenkomat”lar kuchaytirilgan rejimda ishlamoqda. Birinchi o‘rinda ro‘yxatga desant va tank qo‘shinlarida xizmat qilgan odamlar kiritilmoqda.
Bundan tashqari, “Xronika Turkmenistana” manbalariga qaraganda, Ichki ishlar vazirligining viloyatlardagi boshqarmalari shaxsiy tarkibi uchun haftada uch kun harbiy tayyorgarlik bo‘yicha mashg‘ulotlar, shu jumladan, avtomatik quroldan o‘q otish mashqlari o‘tkaziladi.
“Voyenkomat”lar harbiy xizmat yoshidagilar uchun to‘rt haftalik harbiy yig‘inlar tashkillashtirish va o‘tkazishga tayyorlanmoqda.
Avvalroq Turkmaniston Tashqi ishlar vazirligi matbuot xizmati Afg‘oniston chegarasidagi vaziyat yuzasidan bayonot berib, Rossiya ommaviy axborot vositalarini noto‘g‘ri axborot tarqatishda ayblagan edi. Ta’kidlanishicha, Afg‘oniston bilan chegaraga Turkmanistonning harbiy texnikasi va artilleriyasining jalb qilinishi haqida xabarlar haqiqatga to‘g‘ri kelmaydi.
“Xronika Turkmenistana” gazetasi 9-iyul kuni “Tolibon” harakati vakillari Turkmaniston bilan chegara hududidagi Afg‘onistonning Turgundi shahrini egallab olgani haqida xabar bergandi.
Turkmaniston prezidenti Gurbanguli Berdimuhamedov 1-iyul kuni Xavfsizlik kengashining kengaytirilgan yig‘ilishini o‘tkazgan, unda Afg‘oniston bilan chegara hududidagi harbiy safarbarlik kuchaytirilishi qayd etilgan.
Izoh (0)