Germaniya AQSHdan taxminan 2 000 kilometr masofadagi raketalarni uchirishga qodir Typhon mobil yer usti raketa tizimini sotib olmoqchi. Bu haqda ntv xabar berdi.
Germaniya mudofaa vaziri Boris Pistorius bu taklifni Vashingtonga tashrifi chog‘ida yetkazgan. AQSH mudofaa vaziri Pit Xegset so‘rovga ijobiy munosabat bildirgan. 2 000 kilometrgacha bo‘lgan yuqori aniqlikdagi raketalar Rossiya hududini qamrab olishi mumkin. Ammo Pistorius bunday qurilmalar faqat mudofaa maqsadida ishlatilishini ta’kidlagan.
Typhon mobil raketa tizimi (rasmiy nomi Mid-Range Capability – MRC) — bu AQSH armiyasi tomonidan o‘rta masofadagi zarbalar uchun ishlab chiqilgan zamonaviy yer usti platformasidir. U ikki turdagi raketalarni uchirishga mo‘ljallangan:
- Tomahawk qanotli raketalari — 2 000 km masofaga uchadi;
- SM-6 raketalari — taxminan 500 km masofadagi havo va yer nishonlariga zarba bera oladi.
Tizim yuk mashinasi shassisiga o‘rnatilgan bo‘lib, uchirish qurilmalari, boshqaruv punkti va transport-quvvatlovchi texnikalardan iborat. Yuqori harakatchanligi sababli uni qisqa vaqt ichida istalgan hududga ko‘chirish mumkin. Raketalarning uzoq uchish masofasi esa dushman havo hujumidan mudofaa tizimlariga kirmasdan turib ham zarba berish imkonini beradi.
Hozirda Typhon tizimi Filippinda joylashtirilgan. 2026-yilda uni Yevropada ham o‘rnatish rejalashtirilmoqda. Bu NATOning Yevropadagi mudofaa salohiyatini mustahkamlash doirasida amalga oshiriladi.
Izoh (0)