NATO bosh kotibi Mark Ryutte agar Hindiston, Xitoy va Braziliya Rossiya bilan savdoni davom ettirsa, AQSHning ikkilamchi sanksiyalari tufayli jiddiy oqibatlarga yuzlashishidan ogohlantirdi. Bu haqda u AQSH Kongressi senatorlari bilan uchrashuvda ma’lum qildi.
AQSH prezidenti Donald Tramp 14-iyul kuni Ryutte bilan uchrashuv o‘tkazgan edi. O‘shanda u Rossiya 50 kun ichida Ukraina bo‘yicha tinchlik kelishuvini tuzmasa, uning savdo hamkorlariga 100 foizlik boj joriy etishini aytgan.
Men mazkur uch davlatga — Hindiston, Xitoy va Braziliyaga murojaat qilaman... Bu haqda jiddiy o‘ylab ko‘rishingiz kerak. Aks holda, bu sizga juda katta zarar yetkazishi mumkin, degan NATO bosh kotibi.
Shuningdek, Ryutte bu davlatlarni Rossiya prezidenti Vladimir Putinga qo‘ng‘iroq qilib, uni tinchlik muzokaralariga undashga chaqirgan. Tramp esa Rossiya prezidentidan “hafsalasi pir bo‘lganini” bildirgan. Biroq u bilan hali “xayrlashmagani”ni ham alohida ta’kidlagan. AQSH prezidenti, shuningdek, Rossiya rahbari bilan muloqot qilishdan hech qanday foyda yo‘qligini aytgan.
U bilan urushni to‘xtatish kerakligi haqida ko‘p gaplashaman. Go‘shakni qo‘yib, ajoyib suhbat bo‘ldi deyman. Keyin yana raketalar ucha boshlaydi. Bu g‘alati. Bunday holat 3-4 marta takrorlangach, suhbatlardan hech qanday ma’no yo‘qligini tushunib yetdim, degan edi u.
Kreml munosabati
Rossiya prezidenti matbuot kotibi Dmitriy Peskov Trampning bayonotlariga munosabat bildirar ekan, ularni “juda jiddiy” deb baholadi. U Rossiya prezidenti amerikalik hamkasbining so‘zlariga “agar va qachon zarur deb hisoblasa” izoh berishini aytdi.
Rossiya Xavfsizlik kengashi rais o‘rinbosari Dmitriy Medvedev esa Trampning da’volariga javob qaytardi. U AQSH prezidentining 50 kunlik muhlatini “dekorativ ultimatum” deb atadi va Rossiya uchun bunday tahdidlar hamiyatga ega emasligini bildirdi.
Kremldagi manbalarga ko‘ra, Rossiya prezidenti maamlakat iqtisodiyoti va armiyasi G‘arbning yangi sanksiyalariga bardosh bera oladigan darajada kuchli ekaniga ishonadi. Shuning uchun ham u AQSH tomonidan Rossiya neftini xarid qiluvchilarga nisbatan boj joriy etilishi kabi iqtisodiy bosimlarga tayyor turibdi.
Izoh (0)