AQShning Las-Vegas shahrida o‘tayotgan nufuzli Freestyle Chess Grand Slam shaxmat turnirida o‘zbekistonlik grossmeysterlar Nodirbek Abdusattorov va Javohir Sindorov ishtirok etdi. Afsuski, ikki vakilimiz musobaqani 9–12-o‘rinlar bilan yakunlab, bellashuvni erta tark etishdi. Sportchilar ushbu turnirdagi ishtiroki uchun 10 ming dollar miqdorida mukofot puliga ega chiqdi.
Turnirni muvaffaqiyatli boshlagan o‘zbekistonlik shaxmatchilar guruh bosqichida munosib ishtirok etib, pley-off yo‘llanmasini qo‘lga kiritdi. Biroq chorak finalda omad yuz o‘girdi: Abdusattorov hindistonlik Arjun Erigaysiga qarshi bahsda imkoniyatni boy berdi. Sindorov esa amerikalik Hans Nyemanga qarshi asosiy va tay-brek o‘yinlarda durang o‘ynagan bo‘lsa-da, armageddon partiyasida mag‘lub bo‘ldi.
18-iyuldan 19-iyulga o‘tar kechasi shaxmatchilar 3-o‘rin uchun mag‘lublar yo‘lagida yurishini davom ettirdi. Ushbu bosqichda Abdusattorov amerikalik Uesli So, Sindorov esa norvegiyalik Magnus Karslenga qarshi dona surdi.
Abdusattorov va So o‘rtasidagi ikkita klassik partiya durang bilan yakunlandi. Tay-brekda esa amerikalik shaxmatchi ustun keldi. Sindorov va Karslen bahsida ham dastlabki o‘yin durang bo‘ldi, biroq ikkinchi partiyada dunyoning birinchi raqamli shaxmatchisi hisoblangan Karlsen g‘alaba qozondi.
Shu tariqa Nodirbek Abdusattorov va Javohir Sindorov Freestyle Chess Grand Slam turniridagi yurishini yakunladi. Ular yakuniy natijaga ko‘ra 9–12-o‘rinlarni egalladi.
Izoh (0)