Janubiy Koreyada hukmron “Xalq kuchi” konservativ partiyasi rahbari Kim Mun Su prezidentlik saylovlarida mag‘lubiyatga uchraganini tan oldi. Bu haqda Yonhap axborot agentligi xabar bermoqda.
“Koreya Respublikasi duch kelgan inqirozga qaramay, xalqining kuchi bilan oldinga intilishni davom ettirmoqda. Saylangan nomzod Li Chje Men, sizni tabriklayman”, deya ta’kidladi Kim Mun Su.
Shuningdek, u saylovda o‘zini qo‘llab-quvvatlagan saylovchilarga minnatdorchilik bildirgan.
Ma’lum qilinishicha, saylov byulletenlarining 80 foizi hisoblab chiqilgach, Li Chje Men uchun fuqarolarning 48,3 foizi ovoz bergan, ikkinchi nomzod Kim Mun Suni esa saylovchilarning 42,7 foizi qo‘llab-quvvatlagan.
Ta’kidlash joizki, Janubiy Koreyada saylovlar nisbiy ko‘pchilik majoritar tizimi asosida bir bosqichda o‘tkaziladi. Prezidentlik poygasi g‘olibi rasman 4-iyun kuni e’lon qilinishi kutilmoqda.
Koreyadagi harbiy holat va Yunga qarshi impichment
2024-yilning dekabrida Janubiy Koreya prezidenti mamlakatda harbiy holat joriy etishga muvaffaqiyatsiz urinib ko‘rdi. Shundan so‘ng parlament uni isyon ko‘tarishga uringanlikda ayblab, davlat rahbariga impichment e’lon qildi.
Yun 14-dekabrdan (parlament uning impichmenti uchun ovoz berganidan) prezidentlik lavozimidan chetlashtirilgan. Uning o‘zi isyonga urinish ayblovlarini rad etib, harbiy holat joriy etilishi “siyosiy jihatdan tasdiqlangan qaror” ekanini aytgan. U davlatni falaj qilgan muxolifatdan himoya qilish uchun shunday qaror qabul qilgandi.
Ammo Yunni lavozimidan butunlay chetlatish uchun Konstitutsiyaviy sudning qarori kerak edi. Bu vaqt davomida Yun Sok Yol rasman Janubiy Koreya prezidenti bo‘lib qolgan. Harbiy holat e’lon qilishga muvaffaqiyatsiz uringanidan 4 oy o‘tib, Yun lavozimidan butunlay chetlashtirilgan. Prezident o‘z qarori bilan konstitutsiya, qonun ustuvorligi va demokratiya tamoyillarini buzgani ta’kidlangan.
U isyonga urinish ayblovlarini rad etgan va “siyosiy jihatdan tekshirilgan qarori” davlatni muxolifatdan himoya qilish uchun qabul qilinganini aytgan. Uning advokatlari Konstitutsiyaviy suddagi jarayon “noqonuniy va adolatsiz” bo‘lganini bildirgan. Mart oyida sud prezident Yun Sok Yolni hibsdan ozod qilib, unga qarshi hibsga olish orderini bekor qilgan edi.
Izoh (0)