Janubiy Koreya kinematografiyasining ko‘rishga arzigulik yangiliklari haqida ma’lumot beramiz.
“Rahm-shafqat bo‘lmaydi”
Gu Bon San va Li Ju Von bir-biriga dushman bo‘lgan to‘da boshliqlari. Uzoq yillar davomida Nam Gi Jun Bon Sanning ishonchli odami bo‘lib kelgan, biroq yagona ukasi Nam Gi Sok Ju Vonning yordamchisiga aylanganini bilgach, u butunlay ishdan chetlashishga qaror qilgan. 11 yil mobaynida Gi Jun kamtarona hayot kechirib, halol fuqaroga aylanadi. Ammo u o‘z ko‘nikmalarini yo‘qotmagandi. Kutilmaganda u Gi Sokning vahshiylarcha o‘ldirilganini eshitib qoladi. Shundan so‘ng Nam Gi Jun jinoyat olamiga qaytadi, biroq uning yagona maqsadi — qotilni topish va uni shafqatsizlarcha jazolash.
“Bizning film”
Li Je Xa ko‘p yillar oldin otasining izidan borib, buyuk rejissyor bo‘lishga ahd qilgandi va u bunga erishadi. Je Xaning debyut filmi uni jahonga mashhur qiladi. Biroq erishgan muvaffaqiyati unga kutilmagan ta’sir ko‘rsatadi — u boshqa shunday muvaffaqiyatli film suratga ololmasligidan xavotirlanib, bir necha yilga kinodan ketadi. Besh yil o‘tgach, u kino olamiga qaytishga qaror qiladi va umri sanoqli qolgan inson haqida film suratga olmoqchi bo‘ladi. Aynan shu paytda Je Xa Li Da Im bilan tanishadi — u yosh, juda iste’dodli va tuzalmas xastalikka chalingan aktrisa bo‘lib, umri juda oz qolgandi. Ular birgalikda yangi film ustida ishlashni boshlaydi.
“Skalpelli ovchi”
Se Xyon Janubiy Koreyaning eng mohir sud-tibbiyot eksperti bo‘lib, uzoq yillardan beri oilaviy sirlarini atrofdagilardan puxta yashirib keladi. Kunlarning birida unga yordam so‘rab tergovchi Cho Chon Xyon murojaat qiladi. U ruhiy kasal bo‘lgan qotil tomonidan sodir etilgan bir qator qotilliklarni tergov qilmoqda. Tergovchining iltimosiga ko‘ra, Se Xyon navbatdagi murdani yorib ko‘rayotganda, bu qotilliklarga aynan uning otasi aloqador ekanligini aniq ko‘rsatadigan dalillarni topib oladi.
“Saylovdagi sherik”
Se Xun eng a’lochi o‘quvchilardan biri. Bir kuni u maktab avtobusidagi hodisa markazida qolib, atrofdagilar uni chinakam omadsiz deb hisoblashadi. Vaziyatni o‘nglamoqchi bo‘lgan Se Xun direktorning taklifini qabul qiladi va ta’lim muassasasi prezidentligiga 12-nomzodga aylanadi. Musobaqa boshida u mag‘lub bo‘lishiga ishongan bo‘lsa-da, yakuniy saylovlar yaqinlashgan sari Se Xun g‘olib bo‘lishga tobora qat’iyat bilan kirishadi.
“Kyon U va pari”
Pak Son A bir qarashda oddiy yuqori sinf o‘quvchisiga o‘xshaydi. Biroq besh yildan beri u tunlari shomon sifatida ishlaydi va odamlarga muammolarini hal qilishda ko‘maklashadi. Kunlardan bir kuni Pe Kyon U va onasi uning qabuliga kelishadi. Son A yigitni ko‘rishi bilan sevib qoladi, lekin uning yaqinda vafot etishini biladi. Ertasi kuniyoq Kyon U yangi o‘quvchi sifatida uning maktabiga o‘tkaziladi, shunda shomon qiz uni muqarrar o‘limdan qutqarishga ahd qiladi. Shunday qilib, Kyon U va pari o‘rtasida do‘stlik boshlanadi.
“Kalmar o‘yini-3”
Eng mashhur koreys dramalaridan birining yakunlovchi qismi 27-iyun kuni yana ekranlarga qaytadi. Gi Xun qonli o‘yinda shunchaki g‘alaba qozonish bilan cheklanmay, balki uning yaratuvchilarini to‘xtata oladimi yoki sodir bo‘layotgan voqealarning asl mohiyatini anglagach, navbatdagi boshlovchiga aylanadimi?
Izoh (0)