Janubiy Koreyada kelgusi besh yil davomida mamlakatni boshqaradigan 20-prezidentni saylash jarayoni bo‘lib o‘tmoqda. Konstitutsiyaga muvofiq amaldagi prezident Mun Chje In qayta saylanish huquqidan mahrum bo‘lgan. Uning o‘rnini egallash uchun liberal Qo‘shma demokratik partiya a’zosi Li Chje Myon va konservativ asosiy muxolifatdagi Xalq hokimiyati partiyasi nomzodi Yun Sok Yel kurashmoqda.
Reuters agentligining ta’kidlashicha, yangi prezident Janubiy Koreyada COVID-19 pandemiyasining eng og‘ir to‘lqini oqibatlarini yengish, tengsizlikning chuqurlashishi va uy-joy narxlarining ko‘tarilishi, shuningdek, Xitoy va AQSh o‘rtasidagi tobora kuchayib borayotgan raqobatni yengib o‘tish kabi muammolarga duch keladi.
Saylov uchastkalari yopilgach, darhol ovozlarni sanash boshlanadi. Saylovlar Janubiy Koreyada COVID-19 bilan kasallanishning kuchli o‘sishi fonida o‘tkazilmoqda. Avvalroq hukumat karantindagi yuz minglab fuqarolarning saylov uchastkalariga kelishiga ruxsat bergandi.
Saylov organlari ma’lumotlariga ko‘ra, butun mamlakat bo‘ylab saylash huquqiga ega 44 million fuqarolarning 61 foizdan ortig‘i mahalliy vaqt bilan soat 13:00 gacha nomzodlarga o‘z ovozini bergan. Bu raqam saylovchilarning rekord darajadagi ishtirokini anglatadi. Mamlakatda muddatidan oldin ovoz berish 4-martda boshlangan.
Mavzuga doir: Janubiy Koreyada prezidentlik saylovlari oldidan hukmron partiya yetakchisiga hujum qilindi (video)
Milliy saylov komissiyasi ma’lumotlariga ko‘ra, 9-mart kuni janubiy koreyaliklar uchun 14 464 ta saylov uchastkasi xizmat qilmoqda.
Saylov natijalari Janubiy Koreyaning keyingi rivojlanishiga sezilarli ta’sir ko‘rsatishi mumkin, chunki nomzodlarning nuqtayi nazari ham ichki siyosat, jumladan, ijtimoiy ta’minot, ham tashqi siyosat, jumladan, Shimoliy Koreya bilan aloqalar muammosi bo‘yicha farqlanadi.
Eslatib o‘tamiz, 2021-yilning dekabr oyida Janubiy Koreya hukumati mamlakatning birinchi ayol prezidenti, korrupsiya va mansab vakolatini suiiste’mol qilishda ayblangan Pak Kin Xeni afv etgandi. Pakga qarshi 2017-yilning mart oyida impichment e’lon qilingan. Mamlakat rahbari sifatida sodir etgan ko‘plab jinoyatlari va qonunbuzarliklari uchun u muddatidan avval davlat rahbari lavozimidan chetlatilgan va 2018-yilning aprelida 22 yillik qamoq jazosiga hukm qilingandi.
Ma’lumot uchun Janubiy Koreyaning O‘zbekiston bilan savdo aylanmasi Mun Chje In davrida 2016-yildagi 1 milliard dollardan 2021-yil yakunlari bo‘yicha 1,8 milliard dollargacha o‘sdi.
Izoh (0)