Rossiya Federatsiyasi prezidenti Vladimir Putin va Turkiya prezidenti Rajab Toyyib Erdo‘g‘on telefon suhbati chog‘ida Isroilning Eronga qarshi hujumini qoraladi. Shuningdek, muloqot davomida ikki tomonlama munosabatlar va mintaqaviy masalalar muhokama qilingan.
Anadolu agentligining ma’lum qilishicha, suhbat davomida Erdo‘g‘on Isroil hukumatining harakatlarini tanqid qilib, ularni “xalqaro tizimga ochiq tahdid” deb atagan. Shuningdek, Turkiya prezidenti mintaqadagi urush voqealarning nomaqbul rivojlanishi ekanini ta’kidlagan.
Kreml matbuot xizmatining qayd etishicha, Putin va Erdo‘g‘on Isroilning BMT Ustavi va xalqaro huquqning boshqa normalariga zid ravishda Eronga qarshi kuch ishlatish harakatini qoralagan.
“Ikki tomon ham ko‘plab qurbonlarga olib kelgan va butun mintaqa uchun og‘ir uzoq muddatli oqibatlarga olib kelishi mumkin bo‘lgan Eron-Isroil mojarosining davom etayotganidan jiddiy xavotirda ekanligi bildirildi. Rahbarlar jangovar harakatlarni zudlik bilan to‘xtatish va bahsli masalalarni, shu jumladan Eron yadro dasturi bilan bog‘liq masalalarni faqat siyosiy-diplomatik vositalar bilan hal qilish zarurligi haqida fikr bildirdilar”, deyiladi Kreml bayonotida.
Bu borada ikki mamlakatning tegishli idoralari yaqindan hamkorlik qilishga kelishib olingan.
“Ukraina muammosini muhokama qilish chog‘ida Vladimir Putin Turkiya tomoniga Rossiya-Ukraina to‘g‘ridan-to‘g‘ri muzokaralariga tashkiliy yordam ko‘rsatgani uchun minnatdorchilik bildirdi. Ta’kidlanishicha, Rossiya ularning ikkinchi raundi yakunlari bo‘yicha erishilgan kelishuvlarni, jumladan, halok bo‘lgan harbiy xizmatchilarning jasadlarini topshirish va harbiy asirlarni almashish bo‘yicha kelishuvlarni qat’iy bajarmoqda”, deyiladi xabarda.
Bundan avval Putin Tramp bilan telefon orqali suhbatlashgandi, Suhbat 50 daqiqa davom etgandi.
Eron-Isroil mojarosi
13-iyunga o‘tar kechasi Isroil Eron yadro quroli yaratishga yaqinlashgani sababli yadroviy, harbiy obyektlar va yuqori martabali harbiylar joylashgan manzillarga hujum qildi.
Zarbalar oqibatida Islom inqilobi qo‘riqchilari korpusining bir necha rahbarlari va eronlik fizik-yadroshunoslar halok bo‘ldi. Ular orasida Korpus qo‘mondoni Husayn Salamiy, Eron Qurolli kuchlari bosh shtabi boshlig‘i Muhammad Baqeriy, IIQK “Xotam al-Anbiyo” bo‘linmasi qo‘mondoni G‘ulom Ali Rashid, shuningdek, olimlar Faridun Abbosiy Davoniy va Ozod Muhammad Mahdiy Tehronchiy bor. Jami 78 kishi halok bo‘ldi, 320 dan ortiq kishi jarohat oldi.
O‘sha kuni kechqurun Islom inqilobi qo‘riqchilari korpusi Isroilga qarshi “Haqiqiy va’da-3” javob operatsiyasi boshlanganini e’lon qildi. Eron Isroilga uch marta raketa zarbalari berdi, zarbalar bir nechta shaharlarda qayd etildi. 70 dan ortiq kishi jarohat oldi, bir ayol halok bo‘ldi. Shu paytda Tehronda yana portlashlar eshitildi.
Eron va AQSH aprel oyida yadroviy kelishuv bo‘yicha muzokaralarni qayta boshladi, besh raund o‘tkazildi. Ular asosan Ummon hududida va bilvosita tarzda bo‘lib o‘tdi. Eron yadro quroli yaratishga intilish haqidagi ayblovlarni rad etmoqda va kelishuv doirasida uranni boyitishdan voz kechmoqchi emas.
Izoh (0)