Turkiya armiyasi Suriyadagi kurd tuzilmalariga qarshi harbiy operatsiyaga tayyorgarlik ishlarini to‘liq yakunladi, qurolli kuchlar tegishli buyruqni kutmoqda. Bu haqda TGRT Haber telekanali, Turkiye va Memur gazetalari ma’lumot manbalarini ko‘rsatmasdan xabar berdi.
Suriyadagi ushbu operatsiya Turkiya armiyasi uchun 2016-yildan beri beshinchi operatsiya bo‘ladi, bunda Anqara asosan turk qurollaridan foydalanmoqchi, ularning ulushi 80 foizga yetadi.
Nashrlarning ta’kidlashicha, Turkiya hukumati operatsiyada Bayraktar TB2 hujumchi dronlaridan; FIRAT M60TM tanklaridan; T129 ATAK hujum vertolyotlaridan; Koral radioelektron urush tizimlaridan; ÖZGÜR tizimiga muvofiq modernizatsiya qilingan Amerikaning F-16 qiruvchi samolyotlaridan; yuqori aniqlikdagi havo va yerga asoslangan raketalardan keng foydalanishni rejalashtirmoqda.
Turkiya hukumati Suriya shimoli va Iroqdagi “terrorchi” tuzilmalarni to‘liq yo‘q qilish niyatida ekanini may oyining oxirida ma’lum qilgandi. 1-iyun kuni prezident Toyib Erdog‘on Suriya hududida yangi aksilterror operatsiyasi boshlanganini rasman e’lon qildi. Uning aniqlik kiritishicha, asosiy maqsad Tall-Rifat va Manbij shaharlari ustidan nazorat o‘rnatish. Operatsiya Turkiya janubiy chegarasidan 30 kilometr uzoqlikda joylashgan hududda o‘tkazilishi rejalashtirilgan. Bu hududlarda Kurdiston ishchilar partiyasi kuchlari jamlangan, Turkiya hukumati uni terrorchi tashkilot deb biladi.
Izoh (0)