Rossiya prezidenti Vladimir Putin Isroil bosh vaziri Binyamin Netanyaxu va Eron prezidenti Mas’ud Pezeshkiyon bilan telefon orqali suhbat o‘tkazdi. Bu haqda Kreml matbuot xizmati xabar bermoqda.
Muloqot Isroilning Eronga qarshi kuch ishlatish harakati natijasida vaziyatning xavfli darajada keskinlashuvi fonida o‘tkazilgan.
“Rossiya prezidenti Eron Islom Respublikasi rahbariyati va xalqiga Isroil zarbalari oqibatida ko‘plab insonlar, jumladan, tinch aholi qurbon bo‘lgani munosabati bilan hamdardlik bildirdi”, deyiladi xabarda.
Rossiya prezidentining aytishicha, Isroil BMT ustavini va xalqaro huquqni buzgan, Rossiya tomoni esa Eron yadro dasturi atrofidagi vaziyatni tinch yo‘l bilan hal etish bo‘yicha barcha sa’y-harakatlarga har tomonlama ko‘mak berib kelgan.
“Rossiya Isroilning BMT ustavi va xalqaro huquqni buzgan holda amalga oshirgan harakatlarini qoralaydi. Rossiya tomoni Eron yadro dasturi atrofidagi vaziyatni tinch yo‘l bilan hal etish bo‘yicha sa’y-harakatlarni har tomonlama qo‘llab-quvvatladi, o‘zaro maqbul kelishuvlarni topishga qaratilgan aniq tashabbuslarni ilgari surdi. Rossiya bundan buyon ham Eron va Isroil o‘rtasidagi mojaroni yumshatishga ko‘maklashadi”, deya ta’kidlanadi bayonotda.
Putin Netanyaxu bilan suhbatda kuchayib borayotgan keskinlikning oldini olish maqsadida vositachilik xizmatlarini ko‘rsatishga tayyorligini bildirgan.
“Isroil Bosh vaziri bilan suhbatda Rossiya prezidenti muzokaralar jarayoniga qaytish va Eron yadro dasturi bilan bog‘liq barcha masalalarni faqat siyosiy-diplomatik vositalar bilan hal qilish muhimligini ta’kidladi. Shuningdek, vaziyatning yanada keskinlashuviga yo‘l qo‘ymaslik uchun vositachilik xizmatlarini ko‘rsatishga tayyorligini bildirdi”, deya ma’lum qildi Rossiya prezidenti matbuot xizmati.
Ta’kidlanishicha, Rossiya tomoni butun mintaqa uchun eng zararli oqibatlarga olib kelishi mumkin bo‘lgan hozirgi vaziyatni bartaraf etishga qaratilgan Eron va Isroil rahbariyati bilan yaqin aloqalarni davom ettirishga kelishib olingan.
13-iyunga o‘tar kechasi Isroil harbiylari Eronga bir qator zarbalar berdi. Xususan, SAXAL ma’lumotlariga ko‘ra, ular Natanz shahridagi uranni boyitish obyektiga jiddiy zarar yetkazgan va Eronning bir qator yuqori martabali harbiylari, jumladan, Islom inqilobi qo‘riqchilari korpusi qo‘mondoni, shuningdek, yetakchi eronlik yadro fiziklari o‘ldirilgan. Operatsiyadan ko‘zlangan maqsad Eronning yadro qurolini qo‘lga kiritishiga yo‘l qo‘ymaslik edi. Shu bilan birga, Eron o‘zining yadro dasturi tinch maqsadlarga yo‘naltirilganligini bir necha bor ta’kidlagan.
Izoh (0)