Dunyo yetakchilari Berlinda Liviyadagi fuqarolar urushini muhokama qildi

Liviyaning urushayotgan tomonlari va bir qancha xorijiy kuchlarning rahbarlari Shimoliy Afrika mamlakatidagi uzoq davom etgan mojaroni to‘xtatish yo‘llarini muhokama qilish uchun Berlinda uchrashdi. Bu haqda Al-Jazeera xabar bergan.

Tripolining xalqaro miqyosda tan olingan hukumati rahbari Fayoz al-Sarraj va uning raqibi, harbiy qo‘mondon Halifa Xaftar yakshanba kuni Germaniya poytaxtida BMT shafeligi ostidagi yig‘ilishda ishtirok etgan. Bunday muzokaralar 2018-yildan beri ilk marotaba o‘tkazilmoqda.

Tashrif buyurganlar orasida Turkiya prezidenti Rajab Toyyib Erdog‘on, Rossiya prezidenti Vladimir Putin, Fransiya prezidenti Emmanuel Makron, Italiya bosh vaziri Juzeppe Konte, Buyuk Britaniya bosh vaziri Boris Jonson va AQSh davlat kotibi Mayk Pompeo bor. Shuningdek, BAA, Misr, Jazoir, Xitoy va Kongo vakillari hamda BMT, Yevropa ittifoqi, Afrika ittifoqi va Arab davlatlari ligasi rahbarlari ishtirok etadi.

Rasmiy mezbon Germaniya kansleri Angela Merkel, Kongo prezidenti va Liviya bo‘yicha Afrika ittifoqi qo‘mitasini boshqarayotgan Denis Sassou Nguyesso bilan uchrashgan.

Merkel ilgari Liviyaga qurol sotishni taqiqlash (qurol embargosi) Liviya urushidagi yetakchi tomonlar, shuningdek, ularning tashqi hamkorlari va boshqa millat vakillari ishtirok etgan sammitda ustuvor vazifa bo‘lishini ta’kidlagan edi.

Muxolif qo‘mondon Xaftarni BAA, Misr, Iordaniya hamda ruslar qo‘llab-quvvatlamoqda. Fransiya ham unga qandaydir yordam berganlikda ayblanmoqda.

Turkiya Tripolida joylashgan milliy kelishuv hukumatini (hozirda rasmiy hukumat) qattiq qo‘llab-quvvatlaydi va turk parlamenti shu oy boshida Liviyaga harbiy kuch yuborish taklifini ma’qulladi.Ushbu konferensiya Liviyada barqarorlik va tinchlikni tiklashga qaratilgan so‘nggi urinishdir. Urush 2011-yilda NATO operatsiyasi chog‘ida o‘ldirilgan Liviyaning sobiq yetakchisi Muammar Kaddafidan keyin boshlangan edi. O‘shandan beri mamlakat ikkiga bo‘lingan: BMT tomonidan qo‘llab-quvvatlanadigan milliy kelishuv hukumati hamda Liviya sharqidagi Tobruk shahrida joylashgan general Xaftar boshchiligidagi muxolifat.