AQSH prezidenti Donald Tramp Rossiya rahbari Vladimir Putin va Vladimir Zelenskiy bilan ehtimoliy uchrashuvga ochiq, biroq Moskva va Kiyev o‘rtasida tinchlik bo‘yicha ikki tomonlama muzokaralar o‘tkazilishini afzal ko‘radi. Bu haqda Oq uy matbuot kotibi Kerolin Livitt jurnalistlarga ma’lum qildi.
“Prezident agar shu darajaga yetilsa, bunga tayyor ekanligini bildirdi. Biroq u bu ikki rahbar, ikki tomon bir stol atrofiga (muzokaralar stoliga) o‘tirishini xohlaydi. Va bugun biz ularning prezident Tramp chaqirig‘iga binoan shunday qilganini ko‘rdik”, dedi Livitt Trampning Turkiyada Putin va Zelenskiy bilan uch tomonlama muzokaralarga tayyorligi haqidagi savolga javob berar ekan.
Livitt Istanbulda bo‘lib o‘tgan muzokaralarning ikkinchi bosqichiga baho bermagan. U Amerika rahbarining o‘zi keyinroq Rossiya va Ukraina delegatsiyalari uchrashuvi bo‘yicha o‘z nuqtai nazarini bildirishi haqida ma’lum qilgan.
2-iyun kuni Istanbulda Rossiya va Ukraina vakillari o‘rtasidagi to‘g‘ridan-to‘g‘ri muzokaralarning ikkinchi bosqichi yakunlandi. Muzokaralar taxminan bir soat davom etdi, ya’ni may oyida bo‘lib o‘tgan birinchi bosqichdan ikki baravar qisqaroq bo‘ldi.
Uchrashuv Bosfor qirg‘og‘idagi Chiro‘g‘on saroyida o‘tkazildi. Rossiya delegatsiyasiga, avvalgidek, prezident yordamchisi Vladimir Medinskiy, Ukraina delegatsiyasiga esa mudofaa vaziri Rustem Umirov boshchilik qildi.
Muzokaralar yakunlari bo‘yicha o‘tkazilgan matbuot anjumanida Ukraina delegatsiyasi Moskva Kiyevga o‘z talablarini yetkazganini, endi Ukraina hujjatni o‘rganish uchun bir hafta vaqt olishini va keyingi qadamlarini belgilashini ma’lum qildi.
Rossiya delegatsiyasi rahbari Vladimir Medinskiy esa muzokaralardan so‘ng Rossiya ommaviy axborot vositalariga bergan press-yondashuvida Rossiya memorandumi ikki qismdan iborat ekanini — uzoq muddatli tinchlikka qanday erishish va o‘t ochishni to‘liq to‘xtatish uchun qanday qadamlar zarurligini aytdi.
Turkiya prezidenti Rajab Toyyib Erdo‘g‘on 2-iyun kuni Istanbulda Rossiya va Ukraina delegatsiyalari uchrashuvi bo‘lib o‘tganini ta’kidlab, muzokaralarning yanada yuqori darajada davom ettirilishiga umid bildirdi. Shuningdek, Istanbulni tinchlik o‘rnatish markaziga aylantirish istagi borligini ma`lum qildi.
Izoh (0)