O‘zbekiston TIV fuqarolarga murojaat bilan chiqib, Isroil—Eron mojarosi bo‘yicha provokatsiya va haqoratomuz chaqiriqlarga uchmaslikka chaqirdi.
-IHdOR0Bk.avif)
Qayd etilishicha, so‘nggi kunlarda Yaqin Sharq mintaqasida, xususan, Isroil va Eron o‘rtasidagi keskinlik yanada kuchayib, qurolli to‘qnashuvlarga aylandi. Bu esa nafaqat mintaqada, balki butun dunyo hamjamiyatida jiddiy xavotir uyg‘otmoqda.
Mojaroning avj olishi butun mintaqa barqarorligi va tinchligiga tahdid solayotgani shubhasiz. Bu jarayonlar, avvalo, oddiy fuqarolar — tinch aholi, ayniqsa bolalar va ayollar uchun og‘ir oqibatlarga olib kelmoqda.
“O‘zbekiston Respublikasi urushni muammolarni hal etish vositasi deb emas, balki inson hayoti, barqarorlik va taraqqiyotga jiddiy xavf soluvchi holat sifatida baholaydi. Urushda g‘olib bo‘lmaydi. Eng katta yo‘qotishni doim oddiy insonlar tortgan va bugun ham shunday bo‘lmoqda”, deyiladi vazirlik xabarida.
O‘zbekiston har doim tinchlikparvar siyosat yuritib kelgani va shunday davom etishi ta’kidlangan.
“Shu munosabat bilan, O‘zbekiston fuqarolarini tinchlikparvarlik, bag‘rikenglik va masʼuliyatli fuqarolik pozitsiyasini saqlashga chaqirib qolamiz. Mojarolarga nisbatan diniy, irqiy yoki boshqa shaxsiy mansubliklar asosida munosabat bildirmaslik, har qanday nafrat va ziddiyat targ‘ibiga qarshi turish barchamizning umumiy burchimizdir.
Shuningdek, fuqarolarimizni turli provokatsiya va haqoratomuz chaqiriqlarga uchmaslikka, holatlarga nisbatan hissiyot emas, balki vazmin munosabatni saqlab qolishga daʼvat etamiz. Jamiyatimizda milliy va diniy totuvlikni saqlash — umumiy barqarorlik va xavfsizlikning muhim kafolati ekanini eslatamiz”, deyiladi vazirlik murojaatida.
O‘zbekiston TIV barcha mojarolar xalqaro huquq normalari va diplomatik muloqot asosida tinch yo‘l bilan hal etilishi tarafdori ekanini yana bir bor bildirdi. Tinchlik va o‘zaro hurmat asosidagi munosabatlar har doim O‘zbekiston tashqi siyosatining ustuvor yo‘nalishi bo‘lib qoladi.
Izoh (0)