Rekord sarmoyalar: gigant texnologik kompaniyalar 2025-yilda sun’iy intellekt uchun 115 mlrd dollar sarfladi

Meta, Microsoft, Amazon va Alphabet (Google) kabi texnologik gigantlar sun’iy intellekt (SI) rivojiga 2025-yil boshidan beri 155 milliard dollardan ortiq mablag‘ sarfladi. Bu raqam AQSH hukumati tomonidan 2025-moliya yili davomida ta’lim, mehnat va ijtimoiy xizmatlarga ajratilgan mablag‘dan ham katta. Bu haqda The Guardian xabar berdi.

Ekspertlar fikricha, 2026-yilda bu raqam 400 milliard dollardan oshishi kutilmoqda. So‘nggi ikki hafta ichida yirik texnologik kompaniyalar o‘zlarining choraklik moliyaviy hisobotlarini e’lon qildi. Unda yil boshidan beri amalga oshirilgan kapitallashtirilgan xarajatlar (CapEx) — ya’ni ma’lumot markazlari, server, chip va boshqa infrastrukturaga qilingan sarmoyalar keskin oshgani ko‘zga tashlanmoqda. Jumladan:

• Meta — 30,7 milliard dollar (2024-yilning shu davrida bu raqam 15,2 milliard edi);
• Alphabet (Google) — 40 milliard dollar;
• Amazon — 55,7 milliard dollar;
• Microsoft esa faqat joriy chorakda 30 milliard dollar sarflashni rejalashtirmoqda.

Microsoft moliya direktori Eymi Hudning aytishicha, bu ko‘rsatkich 2024-yilgi rekord raqamdan (24,2 milliard dollar) sezilarli darajada yuqori bo‘ladi.

Texnologiya gigantlari 2026-moliya yili uchun yanada ulkan mablag‘lar sarflashni rejalashtirmoqda. Xususan:

• Microsoft — 100 milliard;
• Amazon — 100 milliard;
• Alphabet — 85 milliard (oldingi prognoz — 75 milliard);
• Meta — 66–72 milliard dollar oralig‘ida.

Shunday qilib, ushbu to‘rtta yirik kompaniyaning umumiy sarmoyasi 400 milliard dollardan oshishi kutilmoqda. Bu esa Yevropa Ittifoqining mudofaa uchun har chorakda ajratadigan byudjetidan ham yuqori.

Bunday sarmoyalar investorlarni quvontirmoqda — Microsoft, Google va Meta o‘z xarajatlarini oshirayotganini e’lon qilgach, kompaniya aksiyalari keskin ko‘tarilgan. Jumladan, Microsoft’ning kapitallashuvi 4 trillion dollarga yetgan.

Apple ham SI poygasiga kirishmoqda

Hozircha sun’iy intellekt yo‘nalishida raqobatchilaridan ortda qolayotgan Apple ham xarajatlarini oshirishni boshlagan. Kompaniyaning choraklik CapEx xarajatlari 3,46 milliard dollarni tashkil etmoqda (2024-yili 2,15 milliard edi). Kompaniya rasmiysi Tim Kukning aytishicha, Apple SI bo‘yicha faoliyatini kengaytirmoqda va xodimlarning ko‘p qismi bu jarayonga jalb etilgan.

“Sun’iy intellekt strategiyamiz markazida — uni barcha qurilmalar va platformalarga chuqur integratsiya qilish harkatidamiz”, degan u.