AQSH prezidenti Donald Trampning tahdidlariga qaramay, Hindiston Rossiyadan arzon neft xarid qilishni to‘xtatmaydi. Bu haqda hind rasmiylariga tayanib The Guardian xabar berdi.
Tramp 1-avgust kuni matbuot anjumanida Hindiston neft importini to‘xtatgani eshitib, bu yaxshi yangilik ekanini aytgan.
“Menimcha, Hindiston endi Rossiyadan neft xarid qilmaydi. Shunday deb eshitdim. Bu to‘g‘rimi-yo‘qmi, aniq emas. Lekin agar shunday bo‘lsa, bu yaxshi qaror”, degan Tramp.
Ammo hind rasmiylarining ta’kidlashicha, bunday qaror hali qabul qilinmagan. Neft importi bilan bog‘liq har qanday qaror narx, neft turi, zaxiralar, logistika va boshqa iqtisodiy omillar asosida belgilanadi.
AQSH prezidentining yuqoridagi bayonoti Oq uy Hindistondan import qilinadigan barcha mahsulotlarga 25 foizlik boj joriy qilganidan bir kun o‘tib yangradi. Shuningdek, Rossiyadan qurol va energiya resurslari xarid qilgan davlatlarga nisbatan sanksiyalar qo‘llanishi ham e’lon qilingan edi.
Tramp Rossiya prezidenti Vladimir Putinga urushni to‘xtatish uchun 8-avgustga qadar muddat bergan. Aks holda, Moskvadan neft xarid qiluvchi davlatlarga nisbatan yangi tarif sanksiyalari kuchga kirishi mumkin.
Avvalroq Reuters Hindistonning davlatga qarashli neft kompaniyalari Rossiyadan neft xaridini vaqtincha to‘xtatgani haqida xabar bergandi. Biroq New York Times 2-avgust kuni hind hukumatidagi ikki yuqori martabali rasmiyga tayanib, bunday ko‘rsatma berilmaganini bildirmoqda.
Hind rasmiylariga ko‘ra, Rossiya neftiga AQSH yoki Yevropa Ittifoqi tomonidan to‘g‘ridan-to‘g‘ri sanksiya qo‘yilmagan. Aksincha, G7 va YI davlatlari neft narxiga yuqori chegarani belgilovchi mexanizm joriy etgan. Bu Rossiya daromadlarini cheklab, global ta’minotni ushlab turishni ko‘zlaydi.
Rossiya hozirda Hindistonning eng yirik neft yetkazib beruvchisi hisoblanadi. Umumiy import hajmining 35 foizi shu davlat hissasiga to‘g‘ri keladi. Hindiston Tashqi ishlar vazirligi vakili Randhir Jaysval 1-avgust kuni shunday bayonot berdi:
“Biz bozordagi mavjud takliflarni, narxlarni va global sharoitni hisobga olgan holda xarid qilamiz”.
U, shuningdek, Hindiston va Rossiya o‘rtasidagi barqaror va sinovdan o‘tgan hamkorlik aloqalarini eslab o‘tgan.
Tramp: “Hindiston Rossiya bilan qulashda davom etishi mumkin”
Tramp o‘zining Truth Social ijtimoiy tarmog‘ida 30-iyul kuni Hindistonni tanqid qiluvchi postlar qoldirgan. U Hindiston AQSHning do‘sti bo‘lsa-da, harbiy texnikaning asosiy qismini Rossiyadan xarid qilgani va Xitoy bilan birga Rossiyaning eng yirik energiya xaridori bo‘lib qolayotganini bildirgan.
“Barchamiz Rossiyani Ukrainadagi qirg‘inni to‘xtatishga chaqirayotgan bir vaqtda bu — juda yomon holat”, degan Tramp.
Keyingi postda esa u shunday deydi:
“Hindiston Rossiya bilan nima qilsa, o‘zi biladi. Ikki iqtisodiyot birga qulasa ham, menga baribir”.
Shu orada, 2-avgust kuni Ukraina armiyasi Rossiya hududida neft obyektlariga zarba bergani, xususan Ryazandagi neftni qayta ishlash zavodida yong‘in chiqargani haqida ma’lumot bergan. Hujum davomida neft ombori, harbiy dronlar uchun aerodrom va elektronika zavodi nishonga olingani aytilmoqda.
Izoh (0)