Xitoyda ilk bor Xueba 01 nomli odamsimon robot Shanxay teatr akademiyasining aspiranturasiga qabul qilindi. U kino san’ati va dramaturgiya yo‘nalishi bo‘yicha ta’lim oladi, deb yozmoqda South China Morning Post nashri.
Mazkur gumanoid Shanxay fan va texnologiyalar universiteti hamda DroidUp Robotics kompaniyasi bilan hamkorlikda yaratilgan. Uning “Xueba” nomli xitoyliklar orasida mashhur bo‘lgan jargon so‘z bo‘lib, bunday ibora a’lochi, qiziquvchan va mas’uliyatli talabalarga nisbatan qo‘llaniladi.
Robot ko‘rinish jihatidan erkak kishiga o‘xshaydi, uning bo‘yi 175 sm, sochlari qora. Uning yuz terisi silikon materialdan yasalgan bo‘lib, emotsiya va yuz ifodalarini real insonlardek namoyon eta oladi.
Xueba 01 joriy yil 27-iyul kuni Xitoydagi eng nufuzli san’at maktablaridan biri — Shanxay teatr akademiyasi (STA) doktoranturasi uchun rasman qabul qilingan. Robot ushbu yangilikka izoh berar ekan, o‘zini “sun’iy intellektga ega san’atkor” deb ta’rifladi va o‘qish davomida do‘stlar orttirish, yangi bilimlar olish hamda raqs harakatlarini mukammal egallash istagi borligini bildirdi.
Gumanoid uchun virtual talabalar guvohnomasi ham allaqachon tayyorlab qo‘yilgan, mashhur rassom va professor Yan Tsintsin esa uning ilmiy rahbari etib tayinlangan.
Xueba 01 boshqa talabalar bilan bir qatorda darslarga qatnashadi, opera mashg‘ulotlarida ishtirok etadi va o‘qish oxirida ilmiy dissertatsiyasini himoya qiladi. Asosiy fanlari esa aktyorlik san’ati, ssenariy yozish va dekoratsiya tayyorlash bo‘ladi. Robot o‘qishni muvaffaqiyatli yakunlagach, sun’iy intellekt teatrida yoki muzeyda opera rejissyori bo‘lishi yoki o‘zining robotlar uchun maxsus san’at studiyasini ochishi mumkin.
Izoh (0)