Joriy yil 2–4-avgust kunlari Qirg‘iziston chegara o‘tkazish punktlarida yuk avtomobillari tirbandligi yuzaga kelishi mumkin. Bu haqda 2-avgust kuni Bojxona qo‘mitasi xabar berdi.|
Maʼlum qilinishicha, Qirg‘iziston chegara o‘tkazish punktlarida dasturiy texnik ishlar bajarilmoqda. Bunda tranzit tarzida harakatlanadigan yuk mashinalarining bojxona nazorati va rasmiylashtiruvi jarayonlarini yanada tezlashtirishga xizmat qiluvchi yangi axborot tizimlari joriy etilmoqda.
“Bu haydovchilarning bojxonadan o‘tish jarayonlarini soddalashtirish bilan bir qatorda bunga sarflanadigan vaqtni ham sezilarli darajada qisqartiradi. Shu munosabat bilan Qirg‘iziston Respublikasining chegara o‘tkazish punktlarida hozirda dasturiy texnik taʼmirlash va profilaktik ishlar amalga oshirilmoqda. Yuqoridagilardan kelib chiqib, 2025-yil 2-4-avgust kunlari ushbu davlat bilan chegarada joylashgan bojxona postlarida yuk avtotransport vositalarining qisqa muddatli navbatlari yuzaga kelishi mumkin”, deyiladi rasmiy xabarda.
Avvalroq O‘zbekiston—Qirg‘iziston—Xitoy—Mo‘g‘uliston bo‘ylab birinchi yuk tashuvi sakkiz kunda yetib borgani xabar qilingandi. Murakkab relyefli Oltoy tog‘lari bo‘ylab o‘tgan mazkur yo‘l uzunligi 4500 km masofaga cho‘zilgani qayd etilgan.
Eslatib щtamiz, joriy yil 18-iyul kuni Qirg‘iziston Tojikiston va O‘zbekiston bilan chegaralar tutashgan nuqta to‘g‘risidagi shartnomani ratifikatsiya qildi.
Izoh (0)