Mamlakatda minglab sud qarorlari ijro etilmayotgani bilan bog‘liq murojaatlar soni ortmoqda. Bu haqda 2-avgust kuni bo‘lib o‘tgan Senat majlisida senator Abduhakim Eshmurodov maʼlum qildi.
Senator Abduhakim Eshmurodovning aytishicha, aholida sud qarorlari ijro qilinmayotgani yuzasidan eʼtirozlar ko‘paygan.
“Joriy yil 16-iyun kuni davlat rahbari raisligida o‘tkazilgan yig‘ilishda sud qarorlari vaqtida ijro bo‘lmayotgani yuzasidan murojaatlar ko‘pligi, o‘tgan yili MIBga yuborilgan har beshta sud qaroridan bittasi ijro etilmagani tanqid qilindi. 2023-yilda undirilgan 15,16 trln so‘mlik 469 627 ta ijro hujjatlari muddati, 2024-yilda 27,3 trln so‘mlik 573 930 ta ijro hujjatlari muddati buzilgan holda ijro etilgan. 2025-yil besh oyida aliment undirish bilan bog‘liq 27 849 ta, qarz undirish bilan bog‘liq 9 082 ta, sud qarorlari ijro etilmayotgani yuzasidan 5 713 ta murojaat kelib tushgan”, dedi senator.
Abduhakim Eshmurodov aliment bilan bog‘liq ijro hujjatlari ko‘payib borayotganini ta’kidladi. Xususan, 2024-yil 1-yanvarda aliment undirish bilan bog‘liq ijro hujjatlari soni 298 540 ta bo‘lgan. 2025-yil 1-yanvarga kelib, bu raqam 319 541 taga yetgan.
Tahlillardan aniqlanishicha, murojaatlarning aksariyat qismi aliment undirish (2023-yilda 69 058 ta, 2024-yilda 72 642 ta) hamda MIB xodimlari xatti-harakatlari ustidan shikoyatlar (2023-yilda 8 038 ta, 2024-yilda 11 425 ta) bilan bog‘liq masalalarni tashkil qilgan.
Bundan tashqari, 2025-yilning I choragida 255 ta ishga tiklash bilan bog‘liq ijro hujjatlari o‘z vaqtida bajarilmagan. Ushbu ijro hujjatlarining aksariyat qismi ichki ishlar (80), soliq organlari (18), taʼlim sohasi (16), hokimliklar (14), sog‘liqni saqlash tizimi (6) hissasiga to‘g‘ri keladi.
Senatorlar sud va boshqa organlar hujjatlarining ijro etilishi holati yuzasidan MIBga parlament so‘rovi yuborish bo‘yicha qaror qabul qilgan.
Izoh (0)