“Daryo” oqshomi: Xitoy koronavirusi bo‘yicha 10-martning asosiy xabarlari

Kasallangan va vafot

Xitoy Sog‘liqni saqlash milliy komissiyasi mamlakatda so‘nggi bir sutka ichida 19 kishi koronavirus bilan kasallangani haqida ma’lum qildi. Virusni yuqtirib olganlarning 17 nafari Xubey provinsiyasidan, Pekin va Guandunda ham ikki kishi virusni yuqtirib olgan. Oxirgi bir sutka ichida 17 kishi koronavirus oqibatida vafot etgan. Ularning barchasi — Xubey aholisi.

Epidemiya boshlanganidan buyon Xitoyda 80 754 kishi kasallikka chalingan bo‘lib, ularning 3136 nafari vafot etgan. 59 897 nafar bemor davolanishga muvaffaq bo‘lgan.

Jahon sog‘liqni saqlash tashkilotining ma’lumotlariga ko‘ra, dunyo bo‘ylab 112 427 kishi koronavirus bilan kasallangan. Davolanishga muvaffaq bo‘lganlar soni esa 63 578 kishini tashkil etmoqda. Xitoydan tashqarida kasallik qurbonlari eng ko‘p Italiya (463), Eron (237), Janubiy Koreya (51), AQSh (24) va Fransiyada (19) qayd etilgan.

O‘zbekistondagi vaziyat

Ijtimoiy tarmoqlarda “O‘rtoqlar, bizga, 16-kasalxonaga ikkita koronavirus keldi, ehtiyotlaringni qilinglar, Toshkentda juda ko‘payib ketgan koronavirus, lekin buni yashirishyapti. Ikki qavat niqob taqinglar, ko‘zlaringga ko‘zoynak taqinglar, chunki koronavirus ko‘zning shilliq qavatidan yuqadi”, — degan audioxabarlar tarqaldi. Sog‘liqni saqlash vazirligi matbuot xizmatining “Daryo”ga ma’lum qilishicha, ushbu ma’lumot haqiqatga zid.

Toshkentda 23—25-aprel kunlari bo‘lib o‘tishi rejalashtirilgan Tashkent Law Spring II xalqaro yuridik forumi koronavirus sababli keyinga qoldirildi. Forum tashkiliy qo‘mitasining ma’lum qilishicha, bunday qaror forum qatnashchilari, shu jumladan, xorijiy mehmonlar va O‘zbekiston fuqarolari orasida koronavirus infeksiyasi tarqalishining oldini olish maqsadida qabul qilindi.

Sog‘liqni saqlash vaziri Alisher Shodmonov O‘zbekistonga koronavirus kirib kelmagani ma’lum qildi. Vazirning ta’kidlashicha, agar kasallik mamlakat hududida qayd etiladigan bo‘lsa, unga qarshi kurash uchun dori vositalarining zaxirasi, shuningdek, profilaktika bo‘yicha imkoniyatlar yetarli.

Rossiyada koronavirus yuqtirib olish imkonini nolga teng deb baholagan ekspert O‘zbekistonda koronavirus tarqalishining oldini olishga yordam beradi.

Turkmaniston va Eron o‘rtasidagi chegara yopilishi sababli qariyb 800 nafar haydovchining “Lutfobod” va “Saraxs” chegara nazorat-o‘tkazish punktlarida qolib ketganiga ikki haftadan oshdi. Markaziy Osiyoga Eron orqali tovar olib boruvchi haydovchilar Turkmaniston o‘z hududiga koronavirus kirib kelishidan qo‘rqib, 23-fevral kuni chegaralarni yopib qo‘yganidan keyin qolib ketgandi. Chegarada qolib ketganlar orasida 11 nafar O‘zbekiston fuqarosi ham bor. Ular Shavkat Mirziyoyevga yordam so‘rab, videomurojaat  yo‘llagandi. O‘zbekiston TIV ham bu ma’lumotni tasdiqlab, O‘zbekistonning Tehron shahridagi elchixonasining konsullik bo‘limi 23-fevraldan buyon mazkur fuqarolar bilan doimiy aloqada bo‘lib kelayotganini ma’lum qilgan.

Jahondagi vaziyat

Singapurda shifokorlar yangi turdagi COVID-19 koronavirus infeksiyasi oqibatida yuzaga kelayotgan kasallikning yangi belgilarini aniqladi.

COVID-19 koronavirusi bilan kasallanganlar soni borgan sari ko‘payib bormoqda, bu holat esa Jahon sog‘liqni saqlash tashkiloti infeksiyaning dunyo miqyosida tarqalishi hamda pandemiyaga aylanishi mumkinligini ma’lum qildi.

Italiya bosh vaziri Juzeppe Konte koronavirusning keng tarqalashi sabab mamlakatda barcha sport musobaqalari, shu jumladan, futbol bo‘yicha A Seriya bahslari ham to‘xtatib qo‘yilganini ma’lum qildi.

Endi vaqt yo‘q. Raqamlar kasallik yuqtirib olganlar soni oshib ketganini ko‘rsatib turibdi, o‘limlar soni ko‘paydi. Biz butun Italiya uchun biror nimani qurbonlik qilishga majburmiz. Mana nima uchun bunday og‘ir choralar ko‘rmoqdamiz. A Seriya va barcha sport musobaqalari vaqtincha to‘xtatiladi. Muxlislar buni qabul qilishi kerak.

Juzeppe Konte, Italiya bosh vaziri