AQSH prezidenti Donald Tramp Oq uy hududida ulkan bal zali (bayramlar va raqslar maydoni)ni qurishni va uni mamlakatga hadya qilish etishni rejalashtirmoqda. Bu haqda AQSH prezidentining ma’muriyati ma’lum qildi. Qurilish ishlari 2025-yil sentyabr oyida boshlanadi va Trampning shaxsiy mablag‘lari hisobidan moliyalashtiriladi.
Yangi tantanalar markazining umumiy maydoni 8,4 ming kvadrat metr bo‘lib, 650 kishiga mo‘ljallangan. Bu hozirgi Oq uydagi Sharqiy bal zali (East Room) o‘lchamidan uch baravar kattadir.
Mazkur qurilish 33-prezident Garri Trumen davri (1945–1953-yillar)dan beri amalga oshirilgan eng katta rekonstruksiya bo‘lishi kutilmoqda. Hisob-kitoblarga ko‘ra, Oq uyning sharqiy qanoti buzilib, o‘rniga 200 million dollarlik yangi bino qad rostlaydi.
CNN’ning yozishicha, zal oq va oltin ranglarda bezatiladi, ichki qismi hashamatli qandillar, marmar pol va ustunlar bilan boyitiladi. Yangi bino dizayni Trampning shaxsiy qarorgohi — Florida shtatidagi Mar-a-Lagoni eslatadi.
Loyiha ustida “dunyoning eng yaxshi me’morlari” ishlamoqda, deb yozadi NBC News. Asosiy pudratchi sifatida McCrery Architects arxitektura byurosi tanlangan. Qurilish ishlari 2029-yil yanvarigacha — Trampning prezidentlik muddati yakuniga qadar nihoyasiga yetishi ko‘zda tutilgan.
Oq uy ma’muriyati rahbari Syuzan Uaylzning qayd etishicha, qurilish jarayonida binoning tarixiy qadr-qimmati saqlanib qolgan holda kelajak avlodlar uchun zamonaviy va qulay majmua yaratiladi.
Ma’lumot o‘rnida, Oq uy 1800-yildan buyon bir necha bor kapital ta’mir va qayta qurishlardan o‘tgan. Har bir yirik o‘zgarish muhokama va bahs-munozaralarga sabab bo‘lgan. Masalan, Trumen davrida bino butunlay qismlarga ajratilib, metall konstruksiyalar bilan mustahkamlangan va turli tanqidlarga uchragan. Sharqiy qanot esa 1942-yilda Franklin Ruzvelt boshqaruvi ostida qo‘shimcha tarzda qurilgan. O‘shanda ham davlat AQSH aholisi davlat mablag‘larini isrof qilish haqidagi noroziliklarni bildirgan.
Izoh (0)