23-iyundan 2-iyulgacha bo‘lgan davrda Yevropani qamrab olgan kuchli issiqlik to‘lqini tufayli mintaqaning 12 shahrida taxminan 2,3 ming aholi vafot etgan bo‘lishi mumkin. Bu haqda London Imperial kolleji hamda London gigiyena va tropik tibbiyot maktabi olimlari tomonidan o‘tkazilgan tezkor tadqiqot natijalarida ma’lum qilingan.
Tadqiqot 10 kun davom etgan bo‘lib, bu vaqt mobaynida G‘arbiy Yevropaning katta qismi haddan tashqari issiqlikdan aziyat chekkan. Ushbu davrda Ispaniyada harorat Selsiy bo‘yicha 40 darajadan oshib ketgan, Fransiyada esa o‘rmon yong‘inlari yuz bergan.
Tadqiqot natijalariga ko‘ra, ushbu davrda vafot etgan taxminan 2 300 kishining 1 500 nafari issiqlikni kuchaytirgan iqlim o‘zgarishi bilan bog‘liq.
“Iqlim o‘zgarishi ob-havoni odatdagidan ancha issiqroq qildi, bu esa o‘z navbatida uni ancha xavfliroq qiladi”, dedi London Imperial kolleji tadqiqotchisi doktor Ben Klark.
Tadqiqot 12 ta shaharni, jumladan Barselona, Madrid, London va Milanni qamrab olgan. Olimlarning aytishicha, bu shaharlarda iqlim o‘zgarishi issiq to‘lqin paytida haroratni Selsiy bo‘yicha 4 darajaga oshirgan.
Halok bo‘lganlar sonini baholash uchun olimlar issiqlik asosiy sabab bo‘lgan o‘limlarni, shuningdek, issiqlik ta’siri mavjud kasalliklarni og‘irlashtirgan holatlarni aks ettiruvchi tasdiqlangan epidemiologik modellar va tarixiy o‘lim ma’lumotlaridan foydalanishgan.
Ta’kidlanishicha, ular o‘limlarning taxminiy sonini tezda aniqlash uchun peer-review qilingan usullardan foydalanganlar, chunki issiqlik bilan bog‘liq o‘limlarning aksariyati rasmiy ravishda qayd etilmaydi va ba’zi hukumatlar bu ma’lumotlarni oshkor qilmaydi.
Qayd etilishicha, G‘arbiy Yevropa butun kuzatuvlar tarixidagi eng issiq iyunni boshdan kechirgan, mintaqaning katta qismi “juda kuchli issiqlik stressiga” duchor bo‘lgan.
Izoh (0)