Oxirgi sakkiz yil meteorologik kuzatuvlar tarixidagi eng issiq yil bo‘ldi. Bu haqda Birlashgan Millatlar Tashkiloti bosh kotibi Antoniu Guterrish COP-27 iqlim o‘zgarishi bo‘yicha konferensiya ishtirokchilariga murojaatida aytdi.
Bosh kotibning so‘zlariga ko‘ra, iqlim o‘zgarishi “halokatli tezlikda” bormoqda va sayyora “qayg‘uli signal yubormoqda”.
“Hozirga qadar o‘tgan har bir issiqlik to‘lqini, ayniqsa, zaif aholi orasida yanada kuchliroq va hayot uchun xavfli bo‘ldi”, — dedi u.
Guterrish Jahon meteorologiya tashkiloti hisobotiga shu tariqa fikr bildirdi va uni “iqlim xaosining xronikasi” deb atadi. JMT 6-noyabr kuni taqdim etgan hujjatda aytilishicha, bu yil global o‘rtacha harorat sanoatdan oldingi davrga (1850—1900-yillar) nisbatan 1,15 darajaga yuqori bo‘ladi.
The Guardian ushbu hisobotdan asosiy parchalarni keltirgan:
- atmosferada issiqlikni ushlab turuvchi issiqxona gazlarining konsentratsiyasi 2021-yilda yangi rekord darajaga yetdi;
- dengiz sathi 30 yil oldingiga qaraganda ikki baravar tez ko‘tarilmoqda, global okean harorati esa rekord darajaga yetdi;
- Alp tog‘laridagi muzliklar bu yil har qachongidan ham tezroq erimoqda (Shveysariya muzliklarini monitoring qilish xizmati ma’lumotlariga ko‘ra, muzliklar bu yil umumiy hajmining 6 foizini yo‘qotgan).
Izoh (0)