“Daryo” nashri 10-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Muzlatilgan Rossiya aktivlarini Ukrainaga o‘tkazish jarayoni boshlanmoqda
Estoniya mamlakatda muzlatilgan Rossiya aktivlarini Ukrainaga o‘tkazish imkonini beruvchi qonunchilik bazasini 2023-yilning yanvar oyi oxirigacha yaratishni rejalashtirmoqda. Bu haqda Estoniya Tashqi ishlar vazirligi rasmiy vakili Mixel Tammga tayanib, Bloomberg xabar berdi.
Shunday qilib, Estoniya Yevropa Ittifoqida Rossiya aktivlarini Kiyevga o‘tkazadigan birinchi davlatga aylanishi mumkin, chunki boshqa davlatlar bunday mexanizm yaqin orada yaratilishini e’lon qilganicha yo‘q, deb ta’kidlaydi Bloomberg.
Hozirda Estoniya tomonidan muzlatilgan Rossiya mablag‘larining umumiy miqdori 20 million dollarni tashkil qiladi. Umuman olganda, Yevropa Ittifoqi Rossiyaning 68 milliard yevrolik aktivlarini muzlatib qo‘ygan.
Xitoy va Tayvan nizosi AQSH va Yaponiya hamkorligini kengaytira boshladi
Ayni paytda AQSH va Yaponiya qurolli kuchlari o‘z qo‘mondonlik tuzilmalarini tezkorlik bilan integratsiyalashtirib, qo‘shma operatsiyalarini ko'paytiradi, chunki Vashington va uning Osiyodagi ittifoqdoshlari Xitoy va Tayvanning ehtimoliy nizosiga tayyorlanmoqda. Bu haqda Financial Times xabar berdi.
Bundan tashqari, so‘nggi muzokaralardan so‘ng Yaponiya va AQSH yangi avlod yadro reaktorlarini ishlab chiqishda hamkorlikni yo‘lga qo‘yadi deb yozmoqda Kyodo agentligi.
“Hamma narsa vayron bo‘lgan, hayot deyarli yo‘q” — Zelenskiy Soledar uchun kechayotgan shiddatli janglar haqida gapirdi
Ukraina prezidenti Vladimir Zelenskiy videomurojaatida Donetsk va Lugansk viloyatlaridagi vaziyatni “eng qaynoq” nuqtalar deb atab, Donbass uchun kurash davom etayotganini ta’kidladi.
9-yanvar kuni Ukraina mudofaa vaziri o‘rinbosari Anna Malyar “Vagner” yollanma jangchilarining “eng yaxshi zaxiralari”dan tuzilgan guruhlar Ukraina Qurolli kuchlarining Soledardagi pozitsiyalariga “kuchli hujum” boshlaganini aytgandi. 6 va 7-yanvar kunlari “Vagner” jangchilari Soledar atrofida Ukraina armiyasining mudofaasini yorib o‘tdi, ammo shundan keyin Ukraina kuchlari front chizig‘ini barqarorlashtirishga muvaffaq bo‘lgan.
Bloomberg xabar berishicha ayni vaziyatda Yaponiya Ukrainaning urushdan eng ko‘p jabr ko‘rgan hududlariga 1 million dollarlik tibbiy dorilar xayriya qildi.
Bundan tashqari AQSH hukumati hozirda Ukrainaga Stryker zirxli mashinalarini yetkazib berish masalasini muhokama qilmoqda deb yozadi Politico nashri.
O‘zbekistonda 11-yanvardan o‘quv jarayonlari boshlanadi. Anomal sovuq bo‘lishi kutilayotgan vaziyatda ushbu jarayon qanday tashkillashtiriladi?
Oliy hamda professional ta’lim muassasalari va akademik litseylarda 11-yanvardan boshlab bosqichma-bosqich dars mashg‘ulotlari boshlanadi, deb xabar bermoqda Oliy ta’lim, fan va innovatsiyalar vazirligi matbuot xizmati.
Qayd etilishicha, o‘quv jarayonlarini mahalliy hokimliklar bilan kelishilgan holda tashkil etish tavsiya etildi. Ushbu jarayonlarni belgilangan tartibda amalga oshirish maqsadida har bir ta’lim muassasasida kecha-yu kunduz faoliyat olib boruvchi mutaxassislardan iborat “Shtab” tashkil etiladi.
Anomal sovuq bo‘lishi kutilayotgan 10—18-yanvar kunlarida barcha ta’lim muassasalarida har qanday majlislar, tadbirlar va boshqa yig‘ilishlar o‘tkazish ta’qiqlanadi.
O‘quv jarayonlarini tashkil etishda hudud imkoniyatlarini inobatga olish va bunga zarur shart-sharoitlarni yaratish bo‘yicha ko‘rsatma berildi. Zarurat tug‘ilganda o‘quv grafigiga o‘zgartirish kiritiladi va ob-havo sharoitlari tufayli o‘qishga kelolmagan talabalar nazorat imtihonlariga tayyorgarlik ko‘rishi bo‘yicha tegishli masofaviy dasturlar taklif qilinadi. Alohida ta’kidlaymizki, 20-yanvarga qadar yakuniy nazorat ishlari tashkil etilmaydi”, — deyiladi xabarda.
Izoh (0)