O‘zbekiston Sog‘liqni saqlash vazirligi Jahon sog‘liqni saqlash tashkilotining jaziramadan saqlanish bo‘yicha tavsiyalarini eʼlon qildi.
Tahlillarga ko‘ra, 2022-yili kuzatilgan anomal issiq harorat Yevropada 60 ming nafardan ortiq odamning hayotiga zomin bo‘lgan. Bu — avval prognoz qilinganidan uch barobar ko‘p ko‘rsatkich.
Xavotirli jihati, sayyorada global isish jarayoni davom etar ekan, mazkur raqamlar yildan yilga ortishi mumkin. Shu bois Jahon sog‘liqni saqlash tashkilotining Yevropa mintaqaviy byurosi jaziramadan saqlanish bo‘yicha quyidagi tavsiyalarini eʼlon qildi:
- anomal harorat kuzatilayotgan davrda issiq o‘lkalarga sayohat qilishdan avval ob-havo prognozidan xabardor bo‘lib, ehtiyot choralarini ko‘rgan holda yo‘lga chiqish zarur;
- jaziramada doim salqin suv olib yurish lozim. Zarurat bo‘lmasa, harorat yuqori soatlarda ko‘chaga chiqmaslik va og‘ir jismoniy ishlar bilan shug‘ullanmaslik kerak;
- bunday vaziyatda transport vositalarida bolalar va hayvonlarni qoldirish to‘g‘ri emas. Iloji bo‘lsa, kunduzi kamida ikki-uch soat davomida salqin joyda vaqt o‘tkazgan maʼqul;
- tunda xona derazalarini ochish, kunduzi oftob nurini qaytarish uchun xonalarga pardalar tutish va jazirama kunlarda imkon qadar o‘zidan issiq chiqaruvchi elektr moslamalaridan kamroq foydalanish maqsadga muvofiq;
- organizmning suvsizlanishiga yo‘l qo‘ymaslik uchun kuniga yetarli miqdorda suyuqlik isteʼmol qilish juda muhim.
Mutaxassislar, shuningdek, yengil, tabiiy matodan tikilgan va keng liboslar kiyishni, imkon qadar tez-tez salqin dush yoki vanna qabul qilishni, shakarli, alkogolli yoki kofeinli ichimliklardan voz kechishni tavsiya qiladi.
“Ko‘p vaqtini yolg‘iz o‘tkazadigan yaqinlar, do‘stlar va qo‘shnilar sog‘lig‘idan muntazam xabardor bo‘lishni yoddan chiqarmaylik. Chunki issiq kunlarda zaif odamlar yordamga muhtoj bo‘lishi mumkin”, — deyiladi xabarda.
Anomal harorat taʼsirida bosh aylanishi, ko‘ngil aynishi, holsizlik, bosh og‘rig‘i kabi alomatlar kuzatilsa, shifokorga uchrashish tavsiya etiladi.
“Agar atrofingizdagi insonlarda oftob tig‘i tufayli noodatiy belgilar, masalan, hushni yo‘qotish, talvasa, aqldan ozish kabi simptomlar yuzaga kelsa, darhol tez tibbiy yordamga murojaat qilish zarur”, — deya qayd etiladi tavsiyada.
“O‘zgidromet” ma’lumotlariga ko‘ra, 20-iyul kuni Toshkent shahrida havo biroz bulutli bo‘ladi, yog‘ingarchilik kutilmaydi. Shamol g‘arbdan 3-8 metr/sekund tezlikda esadi, ba’zi joylarda 10-12 metr/sekundgacha kuchayishi, ayrim joylarda chang-to‘zon bilan kuzatilishi mumkin. Harorat kechasi 22-24 daraja, kunduzi 36-38 daraja bo‘ladi.
Izoh (0)