Ruminiyaning eng xushmanzara tog‘li hududlaridan birida ayiq hujumiga uchragan erkak 1-iyul kuni vafot etdi. Bu haqda BBC xabar berdi.
Motosikl haydab kelgan jabrlanuvchi Transfagarasan yo‘lidagi mashhur sayyohlik hududida, ayiqlarga ovqat bermaslik haqida ogohlantiruvchi yozuv yonida to‘xtagan. Ayiq uni balandligi taxminan 80 metr bo‘lgan tik jarlikdan pastga sudrab ketgan.
“Afsuski, biz yetib kelganimizda u allaqachon o‘lgan edi. Jarohatlar o‘ta og‘ir edi. Boshida dubulg‘a va to‘liq himoya vositalari bo‘lsa ham, bu yetarli bo‘lmagan. Maslahatim oddiy: to‘xtamang, ayiqlarga ovqat bermang va masofa saqlang”, dedi tog‘-qutqaruv xizmati rahbari Ion Sanduloiu.
Rasmiylar hayvon hali yo‘q qilinmagani haqida bayonot bergan. Holat yuzasidan tergov harakatlari olib borilmoqda. Ruminiya Yevropa Ittifoqidagi eng ko‘p qo‘ng‘ir ayiq populyatsiyasiga ega.
So‘nggi yillarda odamlar va ayiqlar o‘rtasidagi to‘qnashuvlar ko‘payib bormoqda. Ruminiyaning atrof-muhitni muhofaza qilish vazirligi tomonidan o‘tkazilgan so‘nggi tadqiqotlarda mamlakatdagi qo‘ng‘ir ayiqlar soni 10,4 mingdan 12,8 ming orasidaligi taxmin qilingan. Vazirlik, shuningdek, xavf zonalari xaritalarini joriy etishni rejalashtirmoqda.
Mamlakatda parlamentning quyi palatasi ayiqlar populyatsiyasini kamaytirishni nazarda tutuvchi qonun loyihasini ma’qullagandi. Unga ko‘ra, yuzlab ayiqlarni o‘ldirishga ruxsat berilgan.
Izoh (0)