Polsha 7-iyuldan boshlab Germaniya bilan chegara hududida doimiy chegara nazoratini joriy etdi. Bu haqda Deutsche Welle xabar berdi.
Tegishli chora kamida 5-avgustga qadar amal qiladi. Hozirda 52 ta nazorat-o‘tkazish punktida tanlab tekshirish o‘tkazilmoqda. Polsha yaqin orada Litva bilan chegarada ham shunday choralarni qo‘llamoqchi.
Chegaradan o‘tuvchilarning hujjatlari tekshirilmoqda. Yo‘lovchilar soni ko‘p bo‘lgan avtobuslar va oynalari qoraytirilgan avtomobillarga alohida e’tibor qaratilishi rejalashtirilgan. Polsha bosh vaziri Donald Tuskning aytishicha, bu noqonuniy muhojirlarning “nazorat qilinmaydigan oqimini cheklash” uchun zarur.
Polshaning bu masaladagi sabr-toqati tugab bormoqda, ayniqsa, Polshaga qaytarilayotgan shaxslarning haqiqatan ham bu yerga kelishi kerakligini aniqlash qiyinlashgandan so‘ng, dedi Tusk.
May oyi boshida Germaniyaning yangi ichki ishlar vaziri Aleksandr Dobrint 2015-yilgacha amal qilgan qoidani qayta joriy etdi. Unga ko‘ra, Yevropa Ittifoqi mamlakatlaridan Germaniyaga kelgan boshpana so‘rovchilarni to‘g‘ridan-to‘g‘ri chegarada kiritmaslik mumkin. Faqat bolalar va homilador ayollar bundan mustasno. Germaniya 2023-yil oktyabr oyidayoq Polsha bilan chegarada doimiy nazoratni joriy etgan edi.
Germaniya biznes vakillari Polsha tomonidan joriy etilgan yangi choralardan tashvishlanmoqda. Ular Germaniyada ishlaydigan polshaliklar uchun ishga borish qiyinlashishidan xavotirda. Bu esa, o‘z navbatida, chegaraoldi hududlardagi turli korxonalar — zavodlar, supermarketlar, umumiy ovqatlanish shoxobchalarida ishchi kuchi yetishmovchiligiga olib kelishi mumkin.
Izoh (0)