Yevropaning eng yirik porti — Niderlandiyadagi Rotterdam Rossiya bilan harbiy mojaro yuzaga kelishi ehtimoli uchun o‘z infratuzilmasini tayyorlashga kirishdi. Xususan, portda NATO harbiy ta’minot kemalari uchun joylar ajratilmoqda, shuningdek, urush holatida yuklarni yetkazib berish rejasi ishlab chiqilmoqda. Bu haqda Britaniyaning Financial Times gazetasi xabar bermoqda.
Rotterdam porti direktori Budaveyn Simonsning gazetaga ma’lum qilishicha, u hozirda qo‘shni port — Antverpen bilan Buyuk Britaniya, AQSH va Kanadadan kemalar hamda ushbu mamlakatlardan yuklar kelishi ehtimoli bo‘yicha harakat rejasini muhokama qilmoqda.
“Har qanday terminal ham harbiy yuklarni qabul qilishga mos emas”, deya izoh berdi Simons.
Uning so‘zlariga ko‘ra, katta miqdordagi harbiy yuklar kelgan taqdirda, uning porti Antverpen va boshqa portlarga yukning bir qismini qabul qilishni so‘rab murojaat qilishni rejalashtirmoqda.
Hozirda kattaligi bo‘yicha Yevropada ikkinchi o‘rinda turuvchi Antverpen porti muntazam ravishda Yevropada joylashgan AQSH qo‘shinlari uchun ta’minot ortilgan kemalarni qabul qilmoqda.
Yevropa Ittifoqining Rossiya bilan urush holatidagi choralari
“Rotterdam porti tomonidan ko‘rilayotgan choralar butun Yevropa bo‘ylab Moskva bilan ziddiyat yuzaga kelgan taqdirda olib borilayotgan tayyorgarlikning bir qismi hisoblanadi”, deyiladi maqolada.
Ta’kidlanishicha, Yevropa Ittifoqi qayta qurollanish uchun 800 milliard yevrogacha mablag‘ ajratishni va AQShning mudofaa sohasidagi yordamiga kamroq bog‘liq bo‘lishni rejalashtirmoqda.
FT ma’lumotlariga ko‘ra, Rotterdam konteyner terminali — o‘q-dorilarni bir kemadan boshqasiga xavfsiz o‘tkazish mumkin bo‘lgan yagona joy hisoblanadi.
“Ushbu portda yiliga bir necha marta harbiy mashg‘ulotlar o‘tkazilishi kutilmoqda”, deb yozmoqda nashr.
Rotterdam porti har yili 436 million tonnaga yaqin yukni qayta ishlaydi. Dengizda 28 ming, daryoda esa Germaniya va Yevropaning boshqa mamlakatlaridan keladigan 91 ming kemani qabul qiladi. Bundan tashqari, u strategik neft zaxiralari ombori vazifasini bajaradi.
Izoh (0)