Birlashgan Millatlar Tashkilotiga ixtisoslashgan Jahon meteorologiya tashkiloti maʼlumotlariga ko‘ra, iyul oyining boshi butun sayyora uchun rekord darajadagi eng issiq hafta bo‘ldi. Bu haqda The Guardian xabar berdi.
“Quruqlik va okean harorati o‘z rekordlarini yangiladi, bu esa ekotizim va atrof-muhitga halokatli ta’sir ko‘rsatishi mumkin”, — deyiladi bayonotda.
2023-yil iyun oyi ham tarixdagi eng issiq oy bo‘ldi, deydi BMT rasmiylari. Olimlarning ta’kidlashicha, global yuqori haroratga “El-Ninyo” deb ataluvchi hodisa (Ekvatorial Tinch okeanining markaziy va sharqiy zonalarida suvning sirt qatlami harorati anomal darajada oshishi bilan tavsiflangan tabiiy hodisa), doimiy karbonat angidrid chiqindilari ajralishi va iqlim o‘zgarishi sabab bo‘lmoqda.
“El-Ninyo” hodisasi 2-7 yilda bir marta sodir bo‘lib, 9 oydan 12 oygacha davom etadi.
“‘El-Ninyo’ rivojlanishda davom etar ekan, yangi rekordlar o‘rnatiladi, ushbu iqlim hodisasining atrof-muhitga ta’siri kuchayadi va 2024-yilgacha davom etadi. Bu sayyora uchun tashvishli xabar. Shu yil oxirida uning ta’sirini chindan ham his qilamiz. ‘El-Ninyo’ hali chinakamiga o‘sgani yo‘q”, — dedi JMT iqlim bo‘yicha direktori Kristofer Xyuitt.
Copernicus Yevropa iqlim monitoringi xizmati ma’lumotlariga ko‘ra, o‘tgan hafta harorat, kuzatuvlar boshlangan 1940-yildan beri eng issiq bo‘ldi. 6-iyul kuni meteorologlar dunyodagi eng yuqori o‘rtacha haroratni qayd etdi.
Izoh (0)