So‘nggi yillarda O‘zbekistonning tashqi siyosatda kuzatilayotgan faol, ochiq, pragmatik va amaliy natijalari mamlakatni Markaziy Osiyoda xorijiy investorlar uchun jozibador davlatga aylantirdi.
Yurtimizda amalga oshirilayotgan keng ko‘lamli islohotlar, xalqaro maydondagi faol va samarali diplomatik sa’y-harakatlar natijasida 2024 yilda O‘zbekiston to‘g‘ridan-to‘g‘ri xorijiy investisiyalarni jalb qilish bo‘yicha Markaziy Osiyoda yetakchilikka erishdi.
BMTning Savdo va taraqqiyot bo‘yicha konferensiyasi (UNCTAD) so‘nggi hisobotiga ko‘ra, 2024 yilda O‘zbekiston iqtisodiyotiga kirib kelgan to‘g‘ridan-to‘g‘ri xorijiy investisiyalar hajmi 2,8 milliard AQSH dollarini tashkil etdi. Ushbu natija so‘nggi o‘n yilliklarda mintaqada doimiy ravishda yetakchilikni saqlab kelayotgan Qozog‘istonni ortda qoldirganimizni ko‘rsatadi.
Qozog‘iston 1992 yildan beri ilk marta bu ko‘rsatkich bo‘yicha manfiy natija qayd etib, minus 2,55 milliard AQSH dollari bilan mintaqaviy ro‘yxatda oxirgi o‘rinni egalladi. Turkmaniston 1,6 milliard dollar jalb qilib ikkinchi o‘rin, Qirg‘iziston esa 705 million dollar bilan uchinchi o‘rindan joy oldi. Tojikiston esa 291 million dollar investisiya jalb etishga muvaffaq bo‘ldi.
Mutaxassislar fikricha, O‘zbekistonda investisiya faolligi barqaror o‘sishda davom etmoqda. Birgina raqamli iqtisodiyot sohasiga 2024 yilda 900 million AQSH dollariga yaqin investisiya jalb etildi.
Shuningdek, transport infratuzilmasini rivojlantirish maqsadida 1 milliard dollardan ortiq xorijiy sarmoya kiritildi.
Xorijiy investisiyalarni jalb etish va ularni samarali boshqarish O‘zbekiston iqtisodiy taraqqiyotining asosiy drayverlaridan biri bo‘lib qolmoqda. 2020–2024 yillar oralig‘ida yurtimiz iqtisodiyotida 40 dan ortiq energetika loyihalari uchun 18 milliard dollar miqdorida xorijiy investisiya jalb qilindi. Bu ko‘rsatkich Markaziy Osiyoda rekord natija sifatida baholanmoqda.
Albatta, ushbu yutuqlar o‘z-o‘zidan amalga oshgani yo‘q. Bunda Prezident Shavkat Mirziyoyevning xalqaro maydondagi siyosiy yetukligi va donoligi, dunyo davlatlari bilan mustahkam va o‘zaro manfaatli aloqalar o‘rnatishdagi faol harakatlari katta ahamiyat kasb etadi. Ayni paytda davlatimiz rahbari Ozarbayjonda bo‘lib o‘tayotgan Iqtisodiy hamkorlik tashkiloti sammitida qatnashib, mamlakatimiz nufuzini yanada oshirib, yangi sarmoya va hamkorliklar uchun yo‘l ochmoqda. Bunday yirik xalqaro tadbirlarda faol ishtirok, shubhasiz, O‘zbekistonning kelgusida yanada ko‘proq xorijiy investisiyalarni jalb qilishiga zamin yaratadi.
Izoh (0)