Joriy mavsum uchun qishki transfer oynasining so‘nggi kunida “Neftchi” klubi 4 nafar futbolchini ro‘yxatdan o‘tkazgan bo‘lib, keyinchalik aniqlanishicha, undagi ayrim hujjatlar soxtalashtirilgan bo‘lgan. Bu haqda O‘zPFL xabar berdi.
Maʼlum qilinishicha, O‘zPFL mutaxassislarini “Neftchi” klubiga “Sementchi” jamoasidan kelib qo‘shilgan futbolchilarga tegishli ayrim hujjatlar shubhalantirgan. Keyinchalik mazkur masalada o‘rganishlar olib borildi va ayrim jihatlar qayta tekshirib chiqildi.
Shundan so‘ng O‘zPFL O‘FAning maxsus inspeksiyasiga murojaat qilib, mazkur ishni to‘liq o‘rganib chiqishni so‘radi. O‘tgan davr davomida maxsus inspeksiya to‘plangan barcha ma‘lumotlarni o‘rganib, “Neftchi” va “Sementchi” vakillari bilan suhbatlar o‘tkazdi hamda masalaga oydinlik kiritdi.
“Sementchi” tarkibida ro‘yxatdan o‘tgan 4 futbolchining shartnomasi yakuniga yetmagan bo‘lsa-da, ayni vaqtda “Neftchi” klubida faoliyat olib borayotgan xodimlar 25-fevral kuni O‘zPFLga yuklanishi lozim bo‘lgan hujjatlarni soxtalashtirgan.
Reglamentning buzilishi holatlari aniqlanganidan kelib chiqib, aybdor shaxslar va klubga nisbatan sanksiya qo‘llash uchun ushbu ish O‘FA tegishli qo‘mitasiga oshirildi. Qo‘mita qaror qabul qilgach, bu haqda batafsil ma‘lumot beriladi.
Izoh (0)