Superliganing 8-turidan o‘rin olgan 4 uchrashuv 18—19-may kunlari bo‘lib o‘tdi.
Andijonda “Metallurg”ni qabul qilgan vodiylik futbolchilar durangga imzo chekdi. Uchrashuvning qo‘shib berilgan daqiqalarida mezbon muxlislari tomonidan turli buyumlar otildi. Jismlardan biri “Metallurg” shifokorining boshiga tegishi oqibatida uni jarohatladi.
Ushbu vaziyatda “Andijon” klubi futbolchisi Vladimir Bubanya ham shifokorga nisbatan qo‘pol harakatlarni amalga oshirdi. Bu holat PFL e’tiboridan chetda qolmadi va tashkilot vaziyatni baholash uchun Tartib-intizom qo‘mitasiga shikoyat arizasi yo‘lladi.
“Liga futbolchining bu kabi harakatiga toqat qilmaydi. Futbolchilar salomatligi uchun mas’ul shaxsga nisbatan xatti-harakati uchun Bubanyaga Liga tomonidan berilgan litsenziya vaqtinchalik qaytarib olinadi”, — deyiladi PFL matbuot xizmati bergan xabarida.
Bundan tashqari, tashkilot O‘zbekiston terma jamoasi darvozaboni O‘tkir Yusupovni ham keskin ogohlantirdi.
Superliganing 7-tur uchrashuvida “So‘g‘diyona” bilan uchrashuvda qatnashgan “Navbahor” darvozaboni raqib jamoa muxlislariga qarata nomaqbul harakatlarni amalga oshirgan edi.
8-turdan o‘rin olgan “Neftchi”ga qarshi uchrashuvda “Navbahor” so‘nggi daqiqalarda urilgan gol evaziga g‘alaba qozondi. Mezbonlar darvozaboni O‘tkir Yusupov golni “Neftchi” muxlislari bilan nishonlashga qaror qildi. Bu esa Farg‘onadan kelgan muxlislarning jahlini chiqardi.
PFL darvozabon ishini ko‘rib chiqish uchun O‘FA tartib-intizom qo‘mitasiga murojaat qilgan. Bundan tashqari tashkilot darvozabonga provakatsiyaga uchmaslikni hamda 2022-yilda olingan sanksiyalarni eslatdi.
“Har qanday professional futbolchi provokatsiyalarga e’tibor qilmasligi va, albatta, jamoatchilikni junbushga keltirishi mumkin bo‘lgan xatti-harakatdan tiyilishi shart. Bunga amal qilmagan futbolchi milliy terma jamoa a’zosi bo‘lgan taqdirida ham Liga musobaqalariga qo‘yilmaydi.
Liga Yusupovga 2022-yilgi mavsumda Paxtakor stadionidagi xatti-harakatlari va unga nisbatan chiqarilgan qarorni, qo‘shimchasiga, u nazarda tutgan So‘g‘diyona posbonining 2023-yilgi mavsum Farg‘onadagi xatti-harakati uchun olgan sanksiyasini eslatib o‘tadi”, — deyiladi PFL matbuot xizmati xabarida.
Izoh (0)