Futbol bo‘yicha O‘zbekiston Kubogining nimchorak finalidan o‘rin olgan uchrashuvlar 24-iyun, seshanba kuni o‘tkazildi.
Bugungi kunga ikkita uchrashuv belgilangan edi. Ularning biri Farg‘onada – “Neftchi” – “Mashʼal” o‘rtasida kechdi.
Uchrashuv tezkor gol bilan boshlandi. 6-daqiqada muborakliklar vakili Sardor Abduraimov hisobni ochdi. Shundan so‘ng mezbonlarda ham, mehmonlarda ham qator vaziyatlar yuzaga keldi, biroq ulardan naf chiqmadi. Ushbu gol o‘yin yakuniga qadar saqlanib qoldi va muborakliklar chorak finalga yo‘l oldi.
Navbatdagi bahs esa Jizzaxda o‘tkazildi. “So‘g‘diyona” jamoasi “Qizilqum”ni qabul qildi va ilk daqiqadanoq gol urdi.
Samandar Mavlonqulov jamoasini hisobda oldinga olib chiqdi. 8-daqiqaga kelib navoiyliklar vakili Murodali Usmonov hisobni tenglashtirdi. 18-daqiqaga kelib esa Zoir Jo‘raboyev hisobni yana oshirdi.
Ikkinchi bo‘limning 50-daqiqasida esa Stanislav Andreyev hisobni 3:1 ko‘rinishiga keltirdi. 68-daqiqaga kelib jizzaxliklar vakili Behruz Jumatov qizil kartochka olib, maydondan chetlatildi. 90+2-daqiqaga kelib Jizzax klubi yana gol urdi. Xondamir Mustafoqulovning goli o‘yinga yakuniy nuqtani qo‘yib berdi.
O‘zbekiston Kubogi
Nimchorak final
24-iyun, sershanba
“So‘g‘diyona” — “Qizilqum” 4:1
Gollar: Samandar Mavlonqulov, 1 (1:0), Murodali Usmonov, 8 (1:1), Zoir Jo’raboyev, 18 (2:1), Stanislav Andreyev, 50 (3:1), Xondamir Mustafoqulov, 90+2 (4:1)
Chetlatish: Behruz Jumatov, 68 (“So‘g‘diyona”)
Izoh (0)